Sosial ev satmaq adı ilə dələduzluq etməkdə təqsirləndirilən Fərid Cəfərxanlı və Könül Kərimovanın cinayət işi üzrə məhkəmə prosesi başa çatıb.
Lent.az-ın məlumatına görə, Bakı Ağır Cinayətlər Məhkəməsində hakim Mahmud Ağalarovun sədrliyi ilə keçirilən prosesdə hökm oxunub. Hakimlər kollegiyasının hökmü ilə K. Kərimova 7 il 6 ay, F. Cəfərxanlı isə 6 il müddətinə azadlıqdan məhrum edilib.
Barəsində polis nəzarəti qətimkan tədbiri olan F.Cəfərxanlı məhkəmə zalından həbs edilib
Qeyd edək ki, hər iki şəxs vətəndaşların etibarından sui-istifadə edərək onların ümumilikdə 85 min 785 manat pulunu dələduzluq yolu ilə ələ keçiriblər.
F.Cəfərxanlı və K.Kərimova Bakıda yaşayan 5 şəxsə sosial evlər satacağını vəd ediblər, lakin sonradan onlar vədinə əməl etməyiblər.
Daha sonra F.Cəfərxanlı ilə K.Kərimova zərərçəkmişlərin hüquq-mühafizə orqanları əməkdaşlarına şikayəti əsasında saxlanılıb. İstintaq dövründə onlar dəymiş zərərdən 37 min 758 manat pulu geri qaytarıblar.
