“VAZ-2107” markalı maşınla toqquşan təcili yardım maşını zərbənin gücündən yol kənarındakı mağazaya girib
Gəncə şəhərində “VAZ-2107” markalı avtomobilə təcili tibbi yardım maşın toqquşub. ANS PRESS-in bölgə müxbirnin verdiyi məlumata görə, nəticədə 4 nəfər yaralanıb.
Hadisə şəhərin Şeyxbahəddin küçəsilə Vaqif küçəsinin kəsişməsində Mərkəzi bazarın qarşısında qeydə alınıb. Əli Aşurov idarə etdiyi “VAZ-2107” markalı maşınla hərəkətdə olarkən, həmyerlisi Əkbər Məmmədovun idarə etdiyi təcili tibbi yardım maşını ilə toqquşub. Zərbənin gücündən təcili yardım maşını yol kənarındakı mağazaya girib.
Nəticədə “VAZ-2107” sərnişini 27 yaşlı Turan İsmayılov, təcili yardım maşının sürücüsü və tibb bacıları Şərqiyə Həsənova və Bəsti Əhmədova müxtəlif bədən xəsarətləri ilə Gəncə şəhər Təcili Tibbi Yardım Xəstəxanasının tramatologiya şöbəsinə yerləşdirib.
Həkim Rafil Əsədov ANS PRESS-in bölgə müxbirinə bildirib ki, yaralıların vəziyyəti orta ağırdır. Qəza nəticəsində hər iki avtomobil yararsız hala düşüb. “VAZ-2107”-ın sürücüsu isə hadisə yerindən qaçıb.
Faktla bağlı Gəncə şəhər Baş Polis İdarəsi İstintaq və Təhqiqat şöbəsində araşdırma aparılır. İlkin etimalara görə qəzaya səbəb “VAZ-2107” markalı avtomobili təcili tibbi yardım maşının yoluna çıxıb.
Qaynar.info
