Bakıda səfərdə olan ABŞ Dövlət katibinin demokratiya, insan haqları və əmək məsələləri üzrə köməkçisinin müavini Thomas Melia aprelin 17-də prezident İlham Əliyev, xarici işlər naziri Elmar Məmmədyarov və ATƏT ölkələrinin Azərbaycandakı təmsilçiləri ilə görüşüb.
Bu barədə AzadlıqRadiosuna ABŞ-ın Bakıdakı səfirliyindən məlumat verilib.
Prezident və xarici işlər naziri ilə görüşdə regionda baş verən hadisələr, eləcə də demokratiya, insan haqları və söz azadlığı məsələləri ətrafında fikir mübadiləsi aparılıb.
Thomas Melia-nın siyasi partiya və vətəndaş cəmiyyətinin nümayəndələri ilə də görüşü gözlənilir.
Thomas Melia sonuncu dəfə Azərbaycana 2012-ci ilin dekabrında səfər edib.
Həmin vaxt AzadlıqRadiosuna müsahibəsində amerikalı diplomat Azərbaycanda insan haqları ilə bağlı elə də nəzərəçarpacaq irəliləyiş olmadığını demişdi.
ABŞ nümayəndə heyətinin səfəri aprelin 18-də başa çatır.
Qaynar.info
