"Oğlumun qatil olmadığına əminəm"
Bakı şəhəri, Sabunçu rayonu, Bakıxanov qəsəbəsi, Bəşir Bünyatov küçəsi 10/3 ünvanda yaşayan Böyükağa Knyaz oğlu Məhərrəmov Azərbaycan Respublikasının Prezidenti İlham Əliyevə, baş prokuror Zakir Qaralova və daxili işlər naziri Ramil Usubova müraciət edib.
Qaynar.info həmin müraciəti olduğu kimi təqdim edir:
"Azərbaycan Respublikasının Prezidenti İlham Əliyev cənablarına,
Azərbaycan Respublikasının Baş prokuroru cənab Zakir Qaralova,
Azərbaycan Respublikasının Daxili İşlər Naziri cənab Ramil Usubova
Bakı şəhəri, Sabunçu rayonu, Bakıxanov qəsəbəsi, Bəşir Bünyatov küçəsi 10/3 ünvanda yaşayan Böyükağa Knyaz oğlu Məhərrəmov tərəfindən müraciət
Cənab Prezident!
30 avqust 2013-cü il tarixdə yetkinlik yaşına çatmayan oğlum Kinyazlı Kinyazın da iştirak etdiyi mübahisə zamanı Ceyhun Maksudov adlı şəxs 1 ədəd bıçaq zərbəsi alaraq bir neçə gündən sonra xəstəxanada dünyasını dəyişib.
Bu qətl hadisəsi ilə bağlı Xətai rayon prokurorluğunda 130110422 saylı cinayət işi açılıb. 10 ay davam edən istintaq materiallarında oğlumun ölən şəxsi bıçaqla vurmağı ilə bağlı bir cümlə, hətta bir epizod da olmadığı halda, 16 iyun 2014-cü il tarixdə müstəntiq Teymur Qarayev gecə yuxuda nə görübsə səhəri günü Xətai rayon prokurorluğu oğlumun qatil olması barədə qərar çıxarıb.
Mən oğlumun qatil olmadığına 100 faiz əminəm. Və bilirəm ki, ədalətli istintaq prosesi gedərsə, bu sübut olunacaq.
Cənab Prezident! Mən Sizdən oğluma kömək etməyi xahiş etmirəm. Sizdən artıq dərəcədə xahiş edirəm ki, işin obyektiv aparılması üçün müvafiq orqanlara göstəriş verəsiniz".
Qaynar.info
