Tanınmış araşdırmaçı jurnalist Xədicə İsmayıl həbsdə olarkən yazdığı şeirini sosial şəbəkədə paylaşıb.
"Qaynarinfo.Az" Xədicə İsmayılın 2015-ci ilin may ayında Bakı İstintaq Təcridxanasında yazdığı "Darıxıram" şeirini təqdim edir
Göy cisimlərini yalnız
paqonlarda görürəm burda
Bəlkə o üzdən
ulduzlar belə sönük,
ay belə işıqsız
gəlir röyalarıma
Gözlərimi yumub,
isti nəfəsini duymaq istədiyim gecələrdə
“Ay Allah, bir qapı aç” deyib,
içini çəkən məhbusun
hənirtisi var qulağımda
Daha gəlmirsən yuxularıma
Hər səhər
gecə gördüyünü
xeyrə yozmaqçün
ağbirçək məhbusa,
axar suya,
Yusif peyğəmbərə dil tökən
dustaqlarmı qovdu səni yuxularımdan?
Gəl, qorxma,
çarəsini yuxu yozumunda
axtaranlardan deyiləm mən
Güclüyəm,
ağlamam,
fala baxmam,
dua etməm,
həsrət çəkməm....
... gündüzlər.
Güclü olmaq
bir vicdan borcu bu anda
Təkcə yuxularım anlamır bunu
Darıxıram...
... yuxularımda.
Gəl, qorxma,
Söz verirəm
səhər yuxu yozdurmamağa.
Kürdəxanı,
may 2015
Qaynarinfo.Az
