"Şəhid
dəfnində çəkiliş aparmağa heç bir kəsə icazə verilmir".
Bunu
Qaynarinfo-ya açıqlamasında Xəzər rayon İcra Hakimiyyətinin İctimai-Siyasi və
Humanitar Məsələlər Üzrə Şöbənin rəhbəri Gülbala Qurbanov şəhid əkiz qardaşlar
İman və Bəhrəm Elman oğlunun dəfnindən danışarkən deyib. Onun sözlərinə görə,
sözü gedən qurum tərəfindən şəhidin əmisinə qarşı heç bir kobudluq olunmayıb:
"Hansı
adam şəhidin əmisinə qarşı kobudluq edər? Bu barədə aidiyyatı qurumlardan
hamıya xəbərdarlıq edilib. Yəni, doğrudanmı dövlətimizin əleyhinə gedən
insanlar var? Bunu yazan fikirləşmirmi ki, dövlətin əleyhinə gedir? Çəkiliş
olmaz. Toy deyil ki, çəkiliş aparır? İnşallah, qələbə qazanırıq, istədikləri qədər
qələbə paradından şəkil çəkərlər".
Gülbala
Qurbanov qeyd edib ki, bütün şəhidlər ehtiramla dəfn olunur:
"Şəhid
nə əminin, nə atanın, nə ananın, nə bacı-qardaşın deyil, şəhid xalqın və dövlətindir.
Əkizlərin ailəsini yaxından tanıyıram. Halal olsun onların atası Elman kişiyə.
Dedi ki, lazım olsa, özü də bu vətənə qurbandı. Diqqətli olmalıyıq, düşməni hər
yerdə məğlub eləməliyik".
Qeyd
edək ki, sosial şəbəkədə Bakı Şəhəri Xəzər Rayon İcra Hakimiyyətinın məsul şəxsi
tərəfindən şəhid, əkiz qardaşlar İman və Bəhrəm Elman oğlunun dəfnində şəhidin əmisinə
qarşı kobudluq edildiyi bildirilib. İzləyicilər şəhidin əmisinə dəfndən çəkiliş
etməyə icazə verilmədiyini qeyd edib.
Bahar
Rüstəmli
