İyunun 25-də Nizami Kino Mərkəzində Mədəniyyət və Turizm Nazirliyinin teatr, musiqi, təsviri sənət və kino sahəsində təsis etdiyi ənənəvi "Zirvə” mükafatının təqdimatı olub.Mədəniyyət və turizm naziri Əbülfəs Qarayev Azərbaycan teatrının həm sima, həm də yaradıcılıq prosesi cəhətdən intibah dövrünü yaşadığını bildirib. Nazir qeyd edib ki, Azərbaycan Respublikası Prezidentinin "Azərbaycanda peşəkar milli teatrın yaradılmasının 140 illiyi haqqında” 2013-cü il 1 mart tarixli Sərəncamına əsasən, Azərbaycan peşəkar milli teatrının 140 illik yubileyinə həsr olunmuş silsilə tədbirlər keçirilib. Nəzərə çatdırılıb ki, bu gün həmin tədbirlər planı çərçivəsində artıq 6-cı ildir ki, təsis edilmiş "Zirvə” mükafatının təqdimatıdır.
Bildirilib ki, nazirlik bir il müddətində görülmüş işlərin, əldə edilmiş nailiyyətlərin nəticəsi olaraq teatr, musiqi, təsviri sənət və kino sahələrini əhatə edən 7 nominasiya üzrə mükafatı təqdim edəcək. Diqqətə çatdırılıb ki, indiyədək mükafat mədəniyyət sahəsində tanınmış simalara və kollektivlərə, o cümlədən gənclərə verilib.
Sonra mükafatlar təqdim edilib.
Təsviri sənət sahəsi üzrə Azərbaycan təsviri sənətinin təbliğindəki xidmətlərinə və teatr sahəsindəki uzun illik səmərəli fəaliyyətinə görə xalq rəssamları Tahir Tahirov və Nazim Bəykişiyev, teatr sahəsi üzrə 140 illik yaradıcılıq yoluna və son dövrdəki sənət axtarışlarına görə Azərbaycan Dövlət Akademik Milli Teatrı, musiqi sahəsi üzrə M.F.Axundzadənin 200 illik yubileyi münasibətilə "Molla İbrahimxəlil kimyagər” tamaşasına yazdığı musiqiyə görə Xalq Artisti Siyavuş Kərimi, kino sahəsi üzrə "Dolu” bədii filminin yaradıcı heyəti, "Azərbaycan mədəniyyətinə dəyərli töhfə” bölməsi üzrə Azərbaycanın teatr və kino sənəti sahəsindəki uzunmüddətli səmərəli fəaliyyətinə görə Xalq Artisti Afaq Bəşirqızı, "Milli sərvət” bölməsi üzrə Azərbaycan teatr sənətinin inkişafındakı müstəsna xidmətlərinə və yaradıcılıq uğurlarına görə Xalq Artisti Azərpaşa Nemətov, "Debüt” bölməsində isə beynəlxalq mədəni əməkdaşlıq çərçivəsində TÜRKSOY təşkilatının dəstəyi ilə Saken Seyfullin adına Karaqanda Vilayəti Qazax Dram Teatrında M.F.Axundzadənin "Müsyö Jordan və dərviş Məstəli şah” əsərinin uğurlu səhnə həllinə görə gənc rejissor Mikayıl Mikayılov "Zirvə” mükafatına layiq görülüblər. Qaliblərə rəmzi simvol, diplom və pul mükafatı təqdim olunub.
Tədbir konsert proqramı ilə davam edib. // AzərTAc
