Daxili İşlər Nazirliyi (DİN) kriminal avtoritetə işgəncə verilməsi barədə mətbuatda verilən məlumatlara münasibət bildirib.
Daxili İşlər Nazirliyinin mətbuat xidmətinin şöbə rəisi Orxan Mansurzadə APA-nın sorğusuna cavabında deyib ki, bu günlərdə keçirilmiş əməliyyat tədbiri nəticəsində tutulmuş Qoca Quliyevə işgəncə verilməsi və baxış zamanı üzərində tapılmış tapançanın zorla boynuna qoyulması barədə onun həyat yoldaşı İlahə Quliyevanın mətbuatda yaydığı məlumatlar həqiqətdən uzaqdır, böhtan xarakterlidir.
O. Mansurzadə qeyd edib ki, həyat yoldaşının Qoca Quliyev ilə söhbətinə əsaslanaraq həmin məsələdə İlqar Şabanovun adını hallandırması tamamilə yersizdir: “Bu İlahə Quliyevanın söylədiklərinin qeyri-obyektiv və qərəzli olduğunun daha bir göstəricisidir. Mən İlqar Şabanov ilə əlaqə saxlamışam. O, Qoca Quliyev adlı şəxsi tanımadığını, bu məsələdə onun adının hallandırılmasından təəccübləndiyini bildirib".
İ.Şabanov Gəncə Şəhər Baş Polis İdarəsinin rəisi Faiq Şabanovun qardaşıdır.
Qeyd edək ki, İlahə Quliyeva bəzi KİV-də həyat yoldaşı kriminal avtoritet Qoca Quliyevin şərlənərək tutulması və ona işgəncə verilməsi haqda məlumat yayıb (APA).
Xatırladaq ki, Qoca Quliyev Rusiyada Azərbaycan hakimiyyətinə qarşı yaradıldığı iddia olunan «Milyarderlər ittifaqı»nın üzvü, baş nazir Abbas Abbasovun yaxın qohumudur.
Qaynar.info
