Xəbər verdiyimiz kimi, üzvləri milli komandaların heyətində çıxış edən klublara ödənilməsi üçün UEFA tərəfindən ayrılmış vəsaitlə bağlı AFFA tərəfindən UEFA-ya sorğu göndərilmiş və “Xəzər Lənkəran” klubunun ödənişi ilə əlaqədar UEFA-nın tövsiyəsinə ehtiyac duyulduğu bildirilmişdi.
Qaynarinfo.Az xəbər verir ki, UEFA artıq bu sorğunu cavablandırıb və Avro-2016-nın seçmə mərhələsində “Xəzər Lənkəran” klubuna məxsus futbolçuların milli komanda heyətində çıxışına görə UEFA tərəfindən ayrılmış 120 583 avro 68 sent vəsait UEFA-nın tövsiyəsinə əsasən müvafiq qaydada AFFA-nın vasitəçiliyi ilə klubun hesabına köçürülüb.
Ancaq eyni zamanda, “Xəzər Lənkəran” klubu ötən mövsüm İntizam Komitəsinin çıxardığı qərarlara əsasən AFFA və PFL-ə qalan borcunu ödəyəcək.
Qeyd edək ki, bundan əvvəl AFFA UEFA-nın uşaq futbolu üçün "Xəzər Lənkəran"a ayırdığı 51 104 avronu vermək istəməmiş v bunun üçün Avropanın ali qurumuna sorğu göndərmişdi. UEFA isə bu pulun klubun hesabına köçürülməsində heç bir problemin olmamasına dair cavab vermişdi.
Qaynarinfo.Az
