Bir vaxtlar “Arsenal”ın gələcək hücum liderlərindən biri kimi qiymətləndirilən Cey Emmanuel-Tomasın futbol karyerası gözlənilməz istiqamətdə inkişaf edib. Arsen Vengerin yüksək potensialını qeyd etdiyi futbolçu illər sonra narkotik qaçaqmalçılığı ilə bağlı cinayətə görə azadlıqdan məhrum edilib.

Qaynarinfo xəbər verir ki, Londonda anadan olan Emmanuel-Tomas 8 yaşında “Arsenal” akademiyasına qoşulub. Fiziki gücü, texnikası və universallığı ilə seçilən futbolçu müdafiə, yarımmüdafiə və hücum xəttinin müxtəlif mövqelərində çıxış edib.

16 yaşında “Arsenal”ın 18 yaşadək komandasının kapitanı olan Emmanuel-Tomas 2008-09 mövsümündə FA Gənclər Kubokunun finalında “Liverpul”a qarşı keçirilən iki oyunun birində qol vurub. Həmin komandada Cek Uilşir, Frensis Koklen, Anri Lansberi və Emmanuel Frimpong kimi futbolçular da yer alıb.

2009-cu ildə Arsen Venger onun potensialını yüksək qiymətləndirib. 2010-cu ilin yanvarında futbolçu “Stok Siti”yə qarşı İngiltərə Kuboku matçında əsas heyətdə meydana çıxıb. Həmin ilin oktyabrında isə “Çelsi” ilə oyunda ikinci hissədə meydana buraxılıb.

Venger onun haqqında “Cey qapımı iki əli ilə çox güclü döyür” deyərək futbolçunun fiziki imkanlarını və istedadını vurğulayıb.

Lakin Emmanuel-Tomas “Arsenal”ın əsas komandasında cəmi beş oyunda iştirak edib. 2011-ci ildə klubdan ayrılan futbolçu “Blekpul”, “Kardiff Siti”, “İpsviç Taun” və digər klublarda çıxış edib.

Karyerasında eniş başladı

Emmanuel-Tomas “İpsviç”də Çempionşipdəki ilk mövsümündə ümidverici təsir bağışlasa da, növbəti mövsüm əsas heyətdəki yerini itirib. Daha sonra “Bristol Siti”də çıxış edən futbolçu 2013-14 mövsümündə liqada 15 qol vuraraq karyerasının ən məhsuldar dövrlərindən birini keçirib.

Buna baxmayaraq, o, sonrakı mövsümlərdə sabitliyini qoruya bilməyib. “Kuinz Park Reyncers”, “MK Dons”, “Gillinqem”, “Livenqston” və “Aberdin” kimi klublarda çıxış edən Emmanuel-Tomas uzunmüddətli sabit performans nümayiş etdirməkdə çətinlik çəkib.

2019-cu ildə Taylandın “PTT Rayong” klubuna keçən futbolçunun bu macərası üç ay davam edib. Klub maliyyə problemləri səbəbindən fəaliyyətini dayandırıb.

Daha sonra Hindistanda da qısa müddət çıxış edən Emmanuel-Tomas karyerasının sonrakı mərhələsində Şotlandiyanın aşağı liqalarından birində – “Qrinok Morton”da oynayıb.

600 min funt sterlinqlik narkotik işi

2024-cü ilin sentyabrında futbolçunun həyatı dəyişib.

İstintaqa görə, Emmanuel-Tomas Taylanddan Böyük Britaniyaya narkotik gətirilməsi planında iştirak edib. Onun təşkil etdiyi və maliyyələşdirdiyi səfərdən qayıdan sevgilisi və başqa bir qadının çantalarında Londonun Stansted hava limanında təxminən 60 kiloqram marixuana aşkarlanıb.

Narkotikin ümumi dəyərinin təxminən 600 min funt sterlinq olduğu bildirilib. Emmanuel-Tomasın Taylanddakı narkotik tədarükçüləri ilə Böyük Britaniyadakı satıcılar arasında vasitəçi rolunu oynadığı və qadınların narkotiki ölkəyə gətirməsini təşkil etdiyi müəyyənləşdirilib.

Əvvəlcə ittihamları rədd edən futbolçu daha sonra təqsirini etiraf edib. Müdafiə tərəfi onun uzun müddət klubsuz qalması səbəbindən ciddi maliyyə çətinlikləri yaşadığını və bu səbəbdən “pis qərar verdiyini” bildirib.

2025-ci ilin iyununda Emmanuel-Tomas dörd il müddətinə azadlıqdan məhrum edilib.

Hakim Aleksandr Mills futbolçuya müraciət edərək onun bundan sonra peşəkar futbolçu kimi deyil, törətdiyi cinayətə görə məhkum olunmuş şəxs kimi tanınacağını bildirib.

Futbola qayıtdı

Emmanuel-Tomas cəzasının bir hissəsini çəkdikdən və həbsdə keçirdiyi müddət nəzərə alındıqdan sonra azadlığa buraxılıb. Elektron qolbaq və komendant saatı ilə bağlı məhdudiyyətlərə baxmayaraq, qısa müddət sonra İngiltərənin aşağı liqalarında çıxış edən “Totton” klubuna keçib. Daha sonra “Braintree Town”a transfer olunub.

İlk oyunlarından birində cərimə zərbəsindən qol vuraraq komandasının 2:0 hesablı qələbəsinə töhfə verib. Baş məşqçi Stiv Pitt onun hələ də xüsusi texniki keyfiyyətlərə malik olduğunu bildirib.

Emmanuel-Tomas daha sonra “Baller League”də də çıxış edib və turnirin bombardirlər sıralamasında ikinci yeri tutub.

Bir vaxtlar “Arsenal”ın gələcək ulduzlarından biri kimi qiymətləndirilən 35 yaşlı futbolçunun karyerası böyük potensialdan narkotik cinayətinə və həbs cəzasına qədər uzanan kəskin dönüşlə yadda qalıb.

Aydın