Bu gün Kolumbiyada keçirilən futzal üzrə dünya çempionatında debütant Azərbaycan millisi daha bir tarixi uğura imza atıb.
Qaynarinfo.Az xəbər verir ki, Azərbaycan yığması F qrupunda keçirdiyi son görüşündə 11 qat Asiya çempionları İranla qarşılaşıb.
Bu görüşdə yığmamıza qrup 2-cisi kimi 1/8 finala çıxmaq üçün heç-heçə də kifayət edirdi. Elə belə də olub. Dünya çempionatına ilk dəfə qatılan Azərbaycan İranla 3:3 oynayaraq növbəti mərhələyə qrup 2-cisi kimi vəsiqə qazanıb. Yığmamızdan qolları braziliyalı legionerlərimiz - Tiaqo Bolinya (1-ci dəqiqə, 28-ci saniyə), Qallo (21,37; 31,36), İrandan isə Əhməd İsmayılpur (1,00), Fərhad Təvəküli (20,31) və Hüseyn Tayebi (35,35) vurub.
Bununla da qrupda 4 xal toplayan yığmamız 1/8 finalda son Asiya çempionatının bürünc mükafatçısı Tailandla qarşılaşacaq. Bu görüş Bakı vaxtı ilə sentyabrın 22-dən 23-nə keçən gecə saat 02:30-da baş tutacaq. Bu mərhələni keçəcəyi halda yığmamız 1/4 finalda Portuqaliya - Kosta-Rika cütünün qalibi ilə qarşılaşacaq.
Ümumiyyətlə, 1/8 finalda digər cütlüklər bunlardır: Rusiya - Vyetnam, Kolumbiya - Paraqvay, Braziliya - İran, İspaniya - Qazaxıstan, Argentina - Ukrayna, İtaliya - Misir.
Qaynarinfo.Az
