Hazırda paytaxt Bakıda satılan ən bahalı mənzil Neftçilər prospektində, Dənizkənarı parkın yaxınlığındakı 9 mərtəbəli binada yerləşir.
Yeniavaz.com daşınmaz əmlak alanların və satanların ən çox müraciət etdikləri ixtisaslaşmış elan saytlarına istinadən xəbər verir ki, 9 mərtəbəli binanın 6-cı mərtəbəsində yerləşən 5 otaqlı mənzilin sahəsi 150 kv. metrə bərabərdir.
Mənzilin satış qiyməti isə 10 milyon manat təşkil edir. Təmirli vəziyyətdə olan bu mənzilin 1 kv. metri 66 min 670 manata satışa çıxarılıb.
Paytaxt ərazisində 10 milyon manata satılan daha bir mənzil Neftçilər prospektində yerləşən “Port Baku Residence”dədir. 32 mərtəbəli binanın 10-cu mərtəbəsində yerləşən 9 otaqlı mənzilin sahəsi 1 050 kv. metrə bərabərdir. 350 kv. metr açıq terrası olan bu mənzilin 1 kv. metri 9 min 520 manata satılır.
Bakıda satışa çıxarılan 3-cü ən bahalı mənzilin qiyməti isə 7 milyon 968 min 750 manat təşkil edir. Mənzil Neftçilər prospektindəki “Crescent Residences”də yerləşir. 33 mərtəbəli binanın 28-ci mərtəbəsində yerləşən 3 otaqlı mənzilin sahəsi 375 kv. metrə bərabərdir. Mənzilin 1 kv. metri 21 min 250 manata satışa çıxarılıb.
Paytaxt ərazisində satışda olan ən ucuz mənzil isə Səbail rayonunda “20-ci sahə” adlandırılan ərazidə, 2 mərtəbəli binanın 2-ci mərtəbəsində yerləşir. 48 kv. metr sahəsi olan orta təmirli mənzilin satış qiyməti 30 min 500 manat təşkil edir. Bu mənzilin 1 kv. metri 640 manat təşkil edir və mənzilin “kupçası” yoxdur.
Ucuz mənzillərdən biri də Binəqədi qəsəbəsində yerləşir. Yeni tikilən 4 mərtəbəli binanın 2-ci mərtəbəsində yerləşən 33 kv. metr sahəsi olan 1 otaqlı təmirsiz mənzilin satış qiyməti 33 min manat təşkil edir. Bu mənzilin 1 kv. metri 1 000 manata bərabərdir. Digər mənzil kimi, bu mənzilin də “kupçası” yoxdur.
“Kupça”sı olan ən ucuz mənzil isə Bakıxanov qəsəbəsində yerləşir. 5 mərtəbəli binanın 1-ci mərtəbəsində yerləşən 1 otaqlı mənzilin sahəsi 23 kv. metr təşkil edir. Satış qiyməti isə 40 min manatdır (1 kv. metr 1 740 manat).
Daha bir “kupçalı” mənzil 8 Noyabr metro stansiyasına yaxın, 2 mərtəbəli binanın 2-ci mərtəbəsində yerləşir. Ümumi sahəsi 11 kv. metr olan 1 otaqlı mənzil əvvəllər yataqxana kimi istifadə olunan binadadır. Mənzilin satış qiyməti 39 min manatdır (1 kv. metri 3 min 550 manat).
