Bakıda keçirilən 17 yaşadək futbolçulardan ibarət yığmalar üzrə Avropa çempionatında finalçılardan biri müəyyənləşib.
Qaynarinfo.az xəbər verir ki, bu gün Mərdəkandakı "Dalğa Arena"da keçirilən Portuqaliya - Hollandiya görüşündə yığmamızı ilk oyunda 5:0 hesabı ilə darmadağın etmiş birincilər qalib gəlib.
Yığmamıza 2 qol vurmuş "Benfika"nın futbolçusu Joze Qomeş 25-ci dəqiqədə yenə fərqlənib. O, qitə çempionatında 7-ci qolunu vurub. Digər qolu isə "Portu"nun oyunçusu Dioqu Dalot vurub. O, 56-cı dəqiqədə fərqlənib.
Beləliklə, Portuqaliya millisi qapısında top görmədən finala vəsiqə qazanıb. Bu gün saat 20:00-da başlayacaq Almaniya - İspaniya görüşündən sonra 2-ci finalçı müəyyənləşəcək. Final isə mayın 21-də 8-ci km qəsəbəsindəki stadionda baş tutacaq.
Qaynarinfo.az
