Avropa və digər qitələrdə bir neçə yoldaşlıq oyunları keçirilib.
Qaynarinfo.az xəbər verir ki, bu oyunlarda bizim klublarda çıxış edən legionerlərin bəziləri də meydana çıxıb.
Avstriyada keçirilən Slovakiya - Gürcüstan oyununda Avropa çempionatının (AÇ) debütantı qalib olub - 3:1. Bu oyunda "İnter"də qalıb-qalmayacağı sual altında olan Nika Kvekveskiri 90 dəqiqə meydanda olub. "İnter"in sabiq müdafiəçiləri - Georgi Navalovski 65, Aleksandr Amisulaşvili isə 45 dəqiqə oynayıb. Gürcüstan millisi növbəti matçını iyunun 3-də Buxarestdə AÇ-nin digər iştirakçısı Rumıniyaya qarşı keçirəcək.
Xorvatiyada keçirilən görüşdə də sensasiya baş verməyib. Bizim seçmə qrupda mübarizə aparmış Xorvatiya Moldovanı 1:0 hesabı ilə məğlub edib. AZAL-ın qapıçısı Stanislav Namaşko ehtiyatda qalıb. Moldova millisinin növbəti oyunu iyunun 3-də AÇ-nin digər iştirakçısı İsveçrə ilə olacaq.
Son turda Salvador yığmasının düşərgəsinə yollandığı üçün Azərbaycanda 14 qolla bombardirliyi əldən verən "Zirə"nin hücumçusu Nelson Bonilya yenə qol vurub. O, ABŞ-da Peru ilə keçirilən görüşün 81-ci dəqiqəsində başla qol vursa da, komandası özündən güclü rəqibinə 1:3 hesabı ilə uduzub. Salvador millisi iyunun 1-də ABŞ-da ermənilərlə yoldaşlıq oyunu keçirəcək.
AÇ-nin debütantlarından olan Albaniya millisi Avstriyada Qətərlə görüşüb. Albanlar uduzduqları görüşdə qalib gəliblər - 3:1. "Qarabağ"ın sol cinah müdafiəçisi Ansi Aqolli 66-cı dəqiqədə "Bazel"in futbolçusu Naser Aliyini əvəzləyərək meydana daxil olub. Albaniya millisi iyunun 3-də İtaliyanın Berqamo şəhərində AÇ-nin digər iştirakçısı Ukrayna ilə gücünü sınayacaq.
Bosniya və Herseqovina millisi İsveçrədə AÇ-nin favoritlərindən sayılan İspaniya ilə görüşüb və 1:3 hesabı ilə uduzub. "Qarabağ"ın qapıçısı İbrahim Şexiç ehtiyatda qalıb. Onun komandası iyunun 3-də Yaponiyada keçirilən "Kirin Kuboku"nda Danimarka ilə görüşəcək.
Qaynarinfo.az
