“Qəbələ” İdman Klubu hücumçu Ermin Zetslə yollarını ayırıb.
Qaynarinfo.az xəbər verir ki, ötən ilin iyul ayından “qırmızı-qara” formanı geyinən futbolçu “Qəbələ”nin uğurları üçün 1 mövsüm çalışıb.
Komandanın heyətində 36 oyun keçirib, 10 qol vuran bosniya və herseqovinalı hücumçu 2015/16 mövsümündə "Qəbələ" ilə Premyer Liqanın bürünc mükafatçısı olub. 28 yaşlı legioner Premyer Liqada 23 oyunda 7, Azərbaycan kubokunda 4 oyunda 3 qol vurub, Avropa Liqasında 9 matçda forma geyinib.
Qeyd edək ki, ara-sıra Bosniya və Herseqovina millisinə də çağırılan Ermin Zets "Qəbələ"yə Türkiyənin "Balıkəsirspor" klubundan gəlmişdi. O, "1+1" şərti ilə "Qəbələ" ilə müqavilə bağlamışdı. Lakin bosniyalı baş məşqçi Roman Qriqorçukla yola getmədiyindən (bəzi oyunlarda məşqçinin qohumu Aleksey Antonova üstünlük verilirdi - red.), klubda qalmaq istəməyib. Hətta bu üzdən o son turda "18-liy"ə də daxil edilməyib.
Qaynarinfo.az
