Rumıniyada 19 yaşadək futbolçu qızlardan ibarət yığmalar (U-19) arasında UEFA-nın təşkil etdiyi İnkişaf turniri bu gün start götürüb.
Qaynarinfo.az xəbər verir ki, Azərbaycan millisi meydan sahibi Rumıniya ilə qarşılaşıb və 1:4 hesabı ilə uduzub. Komandamız sabah Sloveniya ilə qarşılaşacaq.
Maraqlıdır ki, elə oğlanlardan ibarət U-19 yığması da qızlardan heç nə ilə seçilmir. Belə ki, bu komanda da dünən Bakı Olimpiya Stadionunda Belarusun U-19-na 1:4 hesabı ilə uduzub. Halbuki 32-ci dəqiqədə belaruslular azərbaycanlı baş hakim Rauf Cabbarovun qırmızı vərəqəsinə əsasən azlıqda qalıbmış. Buna baxmayaraq, qonaqlar Nazim Süleymanovun yetirmələrinə 10 nəfərlə 3 qol vurmağı bacarıb. Tərəflər sabah yenə görüşəcək. Bu dəfə necə olacaq, bunu Nazim bəy daha yaxşı bilər...
Qaynarinfo.az
