Azərbaycanın enerji resursları şübhəsiz ki, yaxın illərdə Avropa və beynəlxalq iqtisadiyyat üçün həyati əhəmiyyətli rol oynayacaq.
Trend-in məlumatına görə, bu barədə Böyük Britaniyanın Baş naziri Devid Kemeronun Bakıda keçirilən 20-ci "Xəzər Neft-Qaz 2013" sərgisinin açılışı ilə bağlı göndərdiyi təbrik məktubunda deyilir.
"Mən Azərbaycan Prezidenti İlham Əliyevi və Azərbaycan xalqını Bakıda 20-ci "Xəzər Neft-Qaz 2013" sərgisinin keçirilməsi münasibəti ilə təbrik edirəm. Mən ölkələrimiz arasında kommersiya əlaqələri ilə qurulan ikitərəfli möhkəm münasibətlərin davamını alqışlayıram."
Kemeronun sözlərinə görə, 2013-cu il "Cənub qaz dəhlizi" layihəsinin həyata keçirilməsi, həmçinin Avropaya boru kəmərinin son marşrutu haqqında bir sıra vacib qərarların qəbul ediləcəyi çox əhəmiyyətli il olacaq: "Lakin hazırda Mərkəzi Asiya qazının "Cənub qaz dəhlizi" vasitəsilə Avropaya çatdırılması üzrə ambisiyaları həyata keçirmək üçün tam ölçüdə işləmək lazımdır. Və mən əminəm ki, bu ambisiyalar reallığa çevriləcəklər".
Qaynar.info
