Ölkə ərazisində havaların kəskin dəyişməsi istiliklə bağlı problemlər yaradıb. Odur ki, sosial şəbəkələrdə qazın təziqi ilə bağlı şikayətlər yer almağa başlayıb.
"Qaynarinfo" xəbər verir ki, qafqazinfo bu məqamda payız-qış mövsümünə hazırlıqlarla bağlı məlumat almaq üçün “Azəriqaz” İstehsalat Birliyi və “Azəristiliktəchizat” ASC ilə əlaqə saxlayıb.
“Azəriqaz” İstehsalat Birliyi mətbuat xidmətinin rəhbəri İbrahim Kərbalayev bildirib ki, payız-qış mövsümü ilə əlaqədar olaraq “Azəriqaz” İB-də artıq may ayından işlərin görülməsinə start verilib:
“Təlimlər planına əsasən cari ilin 8 ayında 25 939 uzunluğunda müxtəlif diametrli qaz boruları təmir edilib. Yeni qaz xətləri çəkilib. Tələbat artdıqca təbii qazın verilməsində artım olur. Qaz xətlərini birdən-birə yükləmək düzgün deyil. Ötən günlərə baxdıqda bugünkü gün qazın verilməsində 567 min kub-metr təbii artım var. Bu da son deyil, dediyim kimi, tələbat artdıqca, qazın təzyiqi artırılacaq.
Onu da qeyd edim ki, 2017-2018 illərin payız-qış mövsümünə hazırlıq bununla tamamlanmır. Qaz xətlərində təhlükə yarada biləcək hal müşahidə edildikdə borular yenilənir”.
“Azəristiliktəchizat” ASC-nin abonent və müştəri xidmətlərinin rəhbəri Rafiq Əliyevin sözlərinə görə, qanunvericiliyə əsasən ölkədə Azəristiliyin verilməsi dağlıq rayonlarda noyabrın 1-dən, Bakı şəhəri və ətraf rayonlarda isə noyabrın 15-dən başlanması nəzərdə tutulur:
““Azəristilik” idarə, təşkilat, təhsil müəssisssi, səhiyyə və bu kimi qurumlarla müqavilə əsasında işləyir. Müqavilədə də il ərzində istilik müddəti 5 ay nəzərdə tutulub. Əgər hansısa bir təşkilat istilik mövsümünü uzatmaq və yaxud vaxtından əvvəl istiliyin verilməsini istəsə bizə yazılı müraciət etməlidir”.
Qaynarinfo.Az
