Türkiyə Super Liqasının XXVI turunda keçiriləcək "Qalatasaray" - "Fənərbaxça" matçının hakimləri açıqlanıb.
Bu barədə Türkiyə Futbol Federasiyası xəbər verib.
Türkiyə Futbol Federasiyası İstanbul derbisinə Mete Kalkavanı hakim təyin edib. Azərbaycanlı futbolsevərlərin də səbirsizliklə gözlədiyi qarşılaşma bazar günü saat 22:00-da start götürəcək.
Klublar turnir cədvəlində ayrı-ayrı mövqelərdə yer alsa da, oyuna maraq həmişə olduğu kimi çox böyükdür. Hazırda "Fənərbaxça"çempionluq uğrunda mübarizə aparır. Son zamanlar heç də yaxşı günlərini yaşamayan "Qalatasaray"da fərqli durum yaşanır.
UEFA tərəfindən aldığı cəza və ardıcıl məşqçi dəyişiklikləri klubun oyununda geriləməyə gətirib çıxarıb. 25 oyundan sonra "Fənərbaxça" 59 xalla turnir cədvəlində II yerdədir. "Qalatasaray" isə 25 oyuna 39 xalla V yerdə qərarlaşıb. Turnir cədvəlinin lideri “Beşiktaş”ın 25 oyuna 60 xalı var.
Keçən il əzəli düşmənlər arasında "Şükrü Saraçoğlu" stadionunda keçirilən oyunu FİFA referisi Cüneyt Çakır idarə etmişdi. Təcrübəli hakimə Bahattin Duran və Tarık Ongun köməklik etmişdi. (anspress)
Qaynar.info
