İtalyan bobu və fransız bobu 2026-cı ildə ən populyar qısa saç düzümləri arasında qalmaqda davam edir. İlk baxışda onlar bir-birinə bənzəsə də, salona getməzdən əvvəl nəzərə alınmalı mühüm fərqləri var.

Qaynarinfo xəbər verir ki, "İnStyle"ın yazdığına görə, hər iki saç düzümü uzunluqdan qurtulmağa və eyni zamanda dəbli, müasir obraz yaratmağa imkan verir. Bununla belə, fransız və italyan boblarının zahiri oxşarlığı onların eyni göründüyü və eyni saç tipinə uyğun gəldiyi anlamına gəlmir. Ekspertlər bu variantlar arasındakı fərqlərdən və saç düzümü seçərkən nələrə diqqət yetirmək lazım olduğundan danışıblar.

Amerikalı saç stilisti İrvinq Ramirez hesab edir ki, bu saç düzümlərinin populyarlığının səbəblərindən biri onların praktikliyidir.

"Qızlar saç baxımına və makiyaja daha az vaxt sərf etmək istəyirlər. İtalyan və fransız boblarına qulluq etmək çox asandır və onları evdə asanlıqla formaya salmaq mümkündür. Mən çimərlik dalğalarının həmişə klassik saç düzümü olaraq qalacağını düşünsəm də, qızlar bu obraza və pandemiyadan sonra bir çoxlarının imtina etmək istəmədiyi uzun saçlara fasilə verərək daha qısa və rahat saç düzümlərinə üstünlük verirlər", – deyə o bildirib. Bərbər Çad Kuk da bob saç düzümünə marağı gündəlik saç baxımını daha asan etmək istəyi ilə əlaqələndirir. Onun sözlərinə görə, bu saç düzümü çox vaxt sərf etmədən ifadəli forma əldə etməyə imkan verir. "Uzun illər çoxsaylı qatları olan mürəkkəb saç düzümlərindən sonra bob təravətli və düşünülmüş görünüşə malikdir. O, aydın forma yaradır, eyni zamanda gündəlik həyatda çox rahat olaraq qalır. Həmçinin sağlam, parlaq saçlara və bahalı görkəmə malik, lakin həddindən artıq formaya salınmış təsiri yaratmayan saç düzümlərinə marağın artdığını müşahidə edirik", – deyə o bildirib.

İtalyan bobu fransız bobundan nə ilə fərqlənir?

Hər iki saç düzümü klassik bob formasına əsaslansa da, vizual olaraq tamamilə fərqli təəssürat yaradır. Əsas fərqlər uzunluq, həcm, sıxlıq və saçın formaya salınma xüsusiyyətləri ilə bağlıdır.

"Fransız bobu daha sərin görünüşə malikdir, qısadır və bir qədər səliqəsiz təsir bağışlayır. Adətən çənəyə qədər çatır və ya bir qədər yuxarıda olur, çox vaxt çolka və ya üzü çərçivəyə alan yumşaq tellərlə tamamlanır. İtalyan bobu isə daha həcmli, yumşaq və qlamur görünür, saçın bütün formasında uzunluq və sıxlıq daha çox olur", deyə Kuk izah edib.

Fransız variantı adətən daha rahat və təbii görünüşə malikdir. İtalyan bobu isə saçın sıxlığına, həcminə və hamarlığına diqqət yetirir. Bu da obrazı daha səliqəli və dəbdəbəli göstərir.

Saçın formaya salınmasına yanaşma da fərqlənir. Fransız bobu nəzərəçarpan tekstura və yüngül səliqəsizlik nəzərdə tutur. Belə saç düzümündə ucların içəriyə doğru burulmasına, pərdə çolkaya və ya bir qədər dağınıq çolkaya tez-tez rast gəlinir. İtalyan bobu isə adətən daha yumşaq formada düzəldilir: çolka daha uzun saxlanılır, saçın ayrımı isə həddindən artıq dəqiq edilmir.

Uyğun bobu necə seçmək olar?

İki variant arasında seçim edərkən yalnız trendləri deyil, saçın xüsusiyyətlərini, həyat tərzini və arzulanan effekti də nəzərə almaq lazımdır. Fransız bobu daha qısa və teksturalı, rahat xarakterli saç düzümlərini sevənlərə uyğundur. İtalyan variantı isə saçın sıx görünüşünü qorumaq və hamar, həcmli forma əldə etmək istəyənlər üçün daha münasibdir.

Bununla belə, saç düzümünün adı seçim zamanı əsas meyar olmamalıdır. Kuk ilk növbədə saçın və xarici görünüşün fərdi xüsusiyyətlərini nəzərə almağı tövsiyə edir.

"Bobu yalnız fransız və ya italyan adlandığı üçün seçməyin. Ən yaxşı saç düzümü saçınızın teksturasına və sıxlığına, üzünüzün formasına və həyat tərzinizə uyğunlaşdırılan saç düzümüdür", deyə o qeyd edib.

Saç düzümünün praktikliyi də az əhəmiyyət daşımır. Hətta ən effektli variant belə yalnız salondan çıxarkən deyil, evdə müstəqil şəkildə formaya salınması və gündəlik həyat üçün də rahat olmalıdır.

"Yaxşı bob salondan çıxan kimi möhtəşəm görünməlidir, lakin səhəri gün vanna otağında hazırlaşarkən də rahat olmalıdır. Məhz burada saç düzümünə fərdi yanaşma həlledici rol oynayır", deyə Kuk əlavə edib.

Aydın