“Balenciaga”nın yeni qış kolleksiyası “Clair-Obscur” Renessans rəngkarlığından ilhamlanan estetikası ilə diqqət çəkir.
Qaynarinfo xəbər verir ki, “Balenciaga” yeni mövsümdə qış dəbinə daha qaranlıq və dramatik prizmadan yanaşır. Moda evinin “Clair-Obscur” adlandırdığı Winter 26 qış kolleksiyasında heykəltəraşlıq xarakterli dərzilik, iriölçülü üst geyimlər və dərin kölgələr arasından seçilən canlı rənglər Renessans rəngkarlığından ilhamlanan estetika ilə bir araya gətirilir.
Fotoqraf Robin Qaliqunun imzasını daşıyan kampaniyada Anok Yai, Liu Ven və Dara Gueye kamera qarşısına keçib. Yüksək Renessans sənətinin simvollarından birinə çevrilən işıq-kölgə texnikasına fokuslanan görüntülərdə işıqla qaranlıq arasındakı kəskin kontrast ön plana çıxarılıb.
Pyerpaolo Piççolinin toxunuşu
Bu iş 2025-ci ildə kreativ direktor vəzifəsinə başlayan Pyerpaolo Piççolinin “Balenciaga”dakı dizayn vizyonunun yeni mərhələsini təşkil edir. Piççoli Renessans dövrünün geyimlərini birbaşa təqlid etmək əvəzinə, həmin dövrün ziddiyyət anlayışını moda evinin mövcud dizayn dili ilə birləşdirir.
Kolleksiyadakı bu gərginlik ən aydın şəkildə üst geyimlərdə hiss olunur. Hündür yaxalar, yumru çiyinlər və oversize proporsiyalar kapüşonlu gödəkçələrə, paltolara və bluzonlara forma verir.
Dəri, xəzli zamşa və yun kimi ağır qış materialları payetlərlə işlənmiş atlas parçalarla birləşdirilərək kontrast yaradılır. Üstünlük təşkil edən qara və tünd neytral tonların arasından qəfil seçilən turşu tonlu parlaq rənglər kampaniyadakı işıqlandırmada olduğu kimi müəyyən detalları ön plana çıxarır.
Aksesuarlar və studiya estetikası
Aksesuarlar sırasında ikonik “Hourglass” modeli “Hourglass Avenue” adı ilə yenidən şərh edilir. Mövsümə yeni əlavə olunan “Le 7 Bowling Bag” isə diqqət çəkən digər məhsuldur.
Ayaqqabılarda isə əyri xətləri ilə seçilən “Bloom Pump” və “Midnight City Mule” kəskin üst geyim parçalarını balanslaşdıran daha yumşaq formalar təqdim edir.
Kontrast mövzusunu studiya mühitinə daşıyan Qaliqu kölgələrdən geyimlərin memarlıq quruluşunu vurğulamaq üçün istifadə edir. Piççoli bu yanaşma ilə Renessansı kostyum arxivi kimi deyil, tarixi kodları forma, proporsiya və işıq vasitəsilə müasir dünyaya daşıyan mənbə kimi təqdim edir.
Aydın
Şərhlər