Norveçin “Bodo/Qlimt” klubu Avropanın nəhəng komandalarına qarşı qazandığı qələbələrlə diqqət çəkir. Təxminən 50 min əhalisi olan kiçik şəhərin təmsilçisinin uğurunda isə keçmiş döyüş pilotu Byorn Mannsverk mühüm rol oynayır. Norveç Hərbi Hava Qüvvələrində 20 ildən çox xidmət edən Mannsverk komandanın psixoloji hazırlığı və diqqətini qoruması istiqamətində çalışır.
Qaynarinfo xəbər verir ki, bu barədə “Goal” nəşri yazıb.
Mannsverk 2017-ci ildən komandada fəaliyyət göstərir. Onun kluba gəlişi “Bodo/Qlimt”in 2016-cı ildə Norveçin yüksək liqasından aşağı düşməsindən sonra baş tutub. Klub rəhbərliyi uğursuzluğun səbəblərindən birinin komandanın psixoloji dayanıqlığının zəifliyi olduğunu düşünərək keçmiş pilotun təcrübəsindən yararlanmağa qərar verib. Mannsverk hərbi xidmətinin son illərində sınaqdan keçirdiyi diqqət və fərqindəlik məşqlərini futbolçulara tətbiq etməyə başlayıb.
Bu yanaşmanın ilk uğurlu nümunələrindən biri yarımmüdafiəçi Ulrik Saltnes olub. Xroniki mədə problemi səbəbindən futbolu tərk etmək həddinə çatan oyunçu 2017-ci ildə Norveçin ikinci liqasında 30 matçda 15 qol vurub. Həmin mövsüm “Bodo/Qlimt” çempion olaraq yüksək liqaya qayıdıb. Klub 2020-ci ildə isə tarixində ilk dəfə Norveç çempionluğunu qazanıb, sonrakı illərdə də ölkə daxilində və Avropada uğurlarını davam etdirib.
Komandanın yüksəlişi Çempionlar Liqasında da özünü göstərib. “Bodo/Qlimt” ötən mövsüm “Mançester Siti” və “Atletiko Madrid” üzərində qələbələr qazanıb, pley-off mərhələsində isə “İnter”i iki oyunun nəticəsinə görə 5:2 hesabı ilə məğlub edərək 1/8 finala yüksəlib. İlk görüşdə “Sportinq”i 3:0 hesabı ilə üstələsə də, cavab matçında 0:5 hesabı ilə uduzaraq mübarizəni dayandırıb.
Mannsverk komandanın uğurunu tək bir şəxsin fəaliyyəti ilə əlaqələndirmir. Onun fikrincə, əsas məqsəd futbolçuların nəzarət edə bildikləri məqamlara diqqət yetirməsi, kiçik addımlarla inkişaf etməsi və gərgin vəziyyətlərdə psixoloji tarazlığı qoruya bilməsidir. Keçmiş pilot hesab edir ki, yüksək səviyyədə davamlı nəticələr əldə etmək üçün komanda rutinlərini qorumaq, bərpaya vaxt ayırmaq və rəqibdən asılı olmayaraq eyni hazırlıq prinsiplərinə əməl etmək vacibdir.
Mannsverkin yanaşması hazırda da aktuallığını qoruyur. “Bodo/Qlimt” həm Norveç çempionluğu uğrunda mübarizə aparır, həm də Avropanın ən güclü klubları ilə rəqabətini davam etdirir. Klubun uğur hekayəsində keçmiş döyüş pilotunun psixoloji hazırlıq üzrə işi komandanın əsas üstünlüklərindən biri kimi qiymətləndirilir.
Qeyd edək ki, komanda ötən gün Çempionlar Liqasının Liqa mərhələsində öz evində Dortmund "Borussiya"sını 1:0 hesabı ilə məğlub edib.
Aydın
