Madonna 2026-cı ilin yayında vintaj moda və parlaq rənglərlə üslubunu yeniləyərək pop musiqisinin ikonası kimi yenidən diqqət mərkəzinə qayıdıb. Onun stilisti Rita Melssen bu dəyişikliyi müasir və keçmiş trendlərin düşünülmüş qarışığı kimi qiymətləndirir.
Qaynarinfo-nun “ELLE” dərgisinə istinadla verdiyi xəbərə görə, Madonna may ayında “Met Gala”dakı cəsarətli görünüşü ilə moda dirçəlişinə start verdi. Bu obraz məşhur sürrealist rəssam Leonora Karrinqtonun (Leonora Carrington) 1945-ci ildə çəkdiyi “Müqəddəs Antoninin sınağı” əsərinə ehtiram idi. Tamamilə qara, cazibədar və mistik üslubda olan “Saint Laurent” libasını o, məşhur Filip Treysinin (Philip Treacy) gəmi qəzasından ilhamlanan papağı ilə tamamlamışdı.
İyun ayında isə Madonna “Confessions II” albomunu təqdim etdi. Bunun ardınca “Times Square”də metalik dəri və çəhrayı alt geyimlərindən ibarət obrazda böyük sürpriz konsert verdi. İyulda Dünya Kubokunun yarımfinal şousunda idman üslublu, çəhrayı və bənövşəyi çalarların üstünlük təşkil etdiyi obrazda səhnəyə çıxdı. Bir neçə gün əvvəl isə Amsterdamda keçirilən “World Pride Music Festival”da Kayli Minouq (Kylie Minogue) ilə birlikdə əyləncəli bənövşəyi geyimdə çıxış etdi.
Pop kraliçası bu yay arxiv modasına və çəhrayı-bənövşəyi rəng palitrasına müraciət edərək üslubunu yenidən formalaşdırıb. Moda dünyasında son dövrlərdə buduara xas estetika və zərif vintaj seçimlərinə marağın artması fonunda Madonnanı 2026-cı ilin yay üslubunun ikonalarından biri hesab etmək olar. O, bir çox müasir tendensiyaları həmin trendlər geniş yayılmamışdan xeyli əvvəl öz üslubunda sınayıb.
“O, sanki kosmosdakı gecə klubundan enmiş, qüsursuz görünüşlü pop ilahəsidir”, — Madonnanın stilisti və geyim obrazlarının yaradıcılarından biri Rita Melssen onun estetikası barədə deyir.
Onlar yeni dövr üzərində birlikdə işləyərək Madonnanın sərhədləri aşan moda üslubunu provokativ və ekstravaqant elementlərlə, həmçinin pop mədəniyyətindən ilhamlanan buduar estetikası ilə birləşdiriblər.
“Bizim rənglərimiz parlaqdır — çəhrayı və bənövşəyi”, — Melssen bildirir. “"Confessions II" ilə əvvəlki "Confessions" dövrü ilə müqayisədə üslubu bir qədər yumşaltdıq. Buduar estetikasına daha çox meyl etdik: kiçik krujevalı donlar, tül elementlər və sair. Bununla yanaşı, məsələn, orijinal «Confessions» dövründən Frida Cannininin (Frida Giannini) möhtəşəm dəri gödəkçələrini saxladıq. Çünki biz həmişə ziddiyyət yaratmaq istəyirik. Heç nəyin həddindən artıq zərif, sərt, təhrikedici və ya diskoya bənzər olmasını istəmirik. Həmişə spektrin iki əks ucundakı elementləri birləşdirməyə çalışırıq”.
Arxiv nümunələrinə gəlincə, Madonna və Melssen həm müğənninin şəxsi kolleksiyasından, həm də onun sevimli dizaynerlərinin arxivlərindən geyim və aksessuarlar seçiblər. Bu yanaşma xüsusilə ayaqqabılarda özünü göstərir. Madonnanın səhnədə geyindiyi bağcıqlı “Yves Saint Laurent” çəkmələri Tom Ford tərəfindən orijinal “Confessions on a Dance Floor” dövrü üçün hazırlanıb.
“Onlarla illərlə rəqs edildiyinə görə çox köhnəliblər. Bu, inanılmazdır”, — Melssen əlavə edir.
Məsələn, “Confessions II” qısametrajlı filmində Madonna vintaj “Dolce & Gabbana” PVC mini donları və kristallarla bəzədilmiş korsetlər geyinir.
Albomu üçün geyindiyi xüsusi hazırlanmış metalik bənövşəyi “Yves Saint Laurent” dikdaban ayaqqabıları da Madonnanın şəxsi kolleksiyasındandır. Orijinal “Confessions on a Dance Floor” dövründə onunla çalışan stilistlər B. Okerlund (B. Åkerlund) və Arianna Fillipsin (Arianne Phillips) əl işi olan vintaj korsetlərindən də istifadə edilir. Bunlarla yanaşı, “Rosamosario” və “Period Corsets” tərəfindən hazırlanmış, antik üslubda yeni korsetlər də obrazlarda yer alır.
“Vintaj geyimləri çox sevirəm, bu, mənim üçün çox vacibdir”, — Melssen bildirir. “Arxiv geyimlərindən istifadəyə dəstək olmaq istəyirəm, çünki bunun tariximizin mühüm hissəsi olduğunu düşünürəm. Keçmişdə baş verənləri heç vaxt unutmamalıyıq”.
İkonanın son obrazlarında mühüm yer tutan aksessuarlardan biri də qeyri-adi əlcəklərdir. Bu detal uzun müddətdir onun fərqli üslubunun bir hissəsidir: krujevalı əlcəklər, sürücü əlcəkləri, uzun opera əlcəkləri. İndi isə Madonna onları üst-üstə taxaraq şəffaf rəngli opera əlcəklərini sürücü əlcəkləri ilə birləşdirir.
“Bizdə müxtəlif rənglərdə əlcəklər var. Hər obraza uyğun və ya onunla kontrast yaradan şəffaf opera əlcəklərindən istifadə edirik”, — Melssen deyir.
Obrazlarda “Dior by John Galliano”nun vintaj gün eynəkləri kimi kifayət qədər şəffaf və rəngli eynəklərə də yer verilir.
“Gün eynəkləri onun üslubu ilə sıx bağlıdır”, — Melssen bildirir. “Amma biz həmişə onun gözlərinin görünməsini istəyirik. Bu, auditoriya ilə əlaqənin çox vacib hissəsidir”.
Madonnanın əvvəlki moda obrazlarında dərin qara, qırmızı, tünd göy, şampan və ağ çalarlar üstünlük təşkil edirdisə, yeni estetika daha parlaq pop üslubuna əsaslanır və 2005-ci ilə, eləcə də daha əvvəlki dövrlərə işıqlı nostalji elementləri əlavə edir.
“Bu, onun qadınlığını və yumşaqlığını nümayiş etdirir. O, çox müstəqil və güclü qadındır, buna görə də üslubu bir qədər yumşaltmaq maraqlı oldu”, — Melssen əlavə edir. “Burada söhbət müxtəlif dövrləri — keçmişi, gələcəyi və indini eyni anda birləşdirməkdən gedir”.
Korsetlərdən və konusvari büstlərdən şalvarlara, eləcə də daim dəyişməyə əsaslanan radikal moda seçimlərinə qədər Madonna özünəməxsus üslub anlayışını formalaşdırmağa davam edir. Növbəti mərhələdə hansı obrazı seçəcəyi isə maraq doğurur.
Cavid
Şərhlər