Bəzi işbazlar min bir dərdin dərmanı olan brokolinin Azərbaycanda yetişdirilməsinə mane olur.
Bunu Qaynarinfo-ya açıqlamasında fermer Anar Abbasov deyib. Onun sözlərinə görə, brokoli Azərbaycanda əkilib-becərilsə, bu onun satış qiymətinə təsir göstərəcək:
"Brokoli bütün restoron şəbəkələrində müəyyən salatlarda istifadə olunur. Dadı qeyri-adidir, gül kələmi kimi deyil, tayı-bərabəri yoxdur. Problem bunu Azərbaycan gətirən işbazlardadır. Bu biz fermerlərin ən yaralı yeridir. Fermerlər onu bəzəkli bağlamalarda gətirib, marketlər şəbəkələrinə kilosunu 6 manata təklif edir. Mən isə onun 1 kilosunu 70 qəpiyə sata bilmədim. Axırda vəziyyət elə gəlib çıxdı ki, onu heyvanlara verdim. Heyvan onu yeyəndə ürəyim ağrıyırdı”.
Anar Abbasov deyir ki, brokolini Azərbaycanda becərib, yetişdirə biləcəyini təklif edib:
"Normalda bunun çəkisi 500-600 qramdır. Onun çəkisini qaldırmaq çox çətindir. Amma mən onun əkdim, açıq havada birinin çəkisini 1 kilo 700 qrama qədər artırdım. Toxum gətirən şirkət bundan xəbər tutdu və gəlib araşdırdılar. Torpaq o qədər münbitdir ki, Azərbaycanda istəlinən məhsulu yetişdirmək olar”.
Bahar Rüstəmli
