Müflis olan banklar: Əmanətlərin taleyi necə olacaq?

 

Qaynarinfo xəbər verir ki, bunu Milli məclisin deputatı Vüqar Bayramov "Günay Bank”da olan əmanətlərin taleyinin necə olacağı ilə bağlı suala aydınlıq gətirərkən deyib. 

Deputat bildirib ki, Mərkəzi Bank "Günay Bank” ASC-nin lisenziyasının ləğv olunması barədə qərar verib:

 

"Bankın bağlanması onun məcmu kapitalının həcminin azlığı ilə əlaqələndirilib. Bank müflisləşən zaman depozitlərinin həcmi 108 milyon 566 min manat olub. Bu portfelin 38.5 milyon manatı sığortalanmış əmanətlərdir. Mövcud qaydalara əsasən, sığortalanmış əmanətlər tam olaraq kompensasiya olunaraq depozit sahiblərinə geri qaytarılacaq. Mərkəzi Bankın məlumatına görə, bankın əmanətçilərinin say etibarı ilə 99,9%-nin əmanətləri kompensasiya olunacaq. Bununla belə, bankda olan 70 milyon manata yaxın əmanət sığortalanmayıb. Əmanətçilər ilə depozit portfelinin həcminin müqayisəsi göstərir ki, sığortalanmamış əmanət az sayda vətəndaşlara məxsusdur. Yəni, bir sıra şəxslərin bu bankda milyonlarla ifadə olunan əmanətləri olub”. 

Deputat qeyd edib ki, hazırda fiziki şəxslərin bankda olan 100 min manatadək olan əmanətləri sığortalanır:

 

"Bu zaman milli valyutada olan əmanətlər üzrə qorunan divident faiz dərəcəsi 12, xarici valyutada isə 2.5 faizdir. Əmanətlərin Sığortalanması Fondu qorunan əmanətləri geri qaytarır, qorunmayan depozitlər isə praktik olaraq bankın məsuliyyətindədir. Müflis olan bankda isə qorunmayan əmanətlər aktivlər passivlərin üstələdiyi halda qaytarıla bilər”.