Topaz Premyer Liqasında XXV turun oyunları davam etdirilib. Qaynarinfo xəbər verir ki, ikinci oyun günündə iki görüş baş tutacaq.
Günə paytaxt derbisi ilə start verilib. 8 oyundu uduzmayan "Neftçi” Avropa Liqasına bir addım da yaxınlaşmaq üçün "Keşlə”ni itkisiz keçməli idi. Tərlan Əhmədovun yetirmələri ardıcıl 3-cü qələbəni qazansa, ən azı bir günlük 3-cü pilləyə yüksələcək və "Sumqayıt”ın büdrəməsinə ümid edəcəkdi.
Oyuna fəal başlayan "Keşlə" 21-ci dəqiqədə Vaqif Cavadovun qoluna sevinib. Məğlubiyyətdən qaçmaq istəyən "Neftçi"nin səyləri 42-ci dəqiqədə nəticə verib. Namiq Ələsgərovun qolu matçda bərabərliyi təmin edib. Lakin "Keşlə" 68-ci dəqiqədə qələbə qolunu vura bilib. Bu dəfə Adrian Skarlatake fərqlənib - 2:1. Bununla da çempionatda iddiası olmayan "Keşlə” isə ardıcıl qol vurduğu oyunların sayını 11-ə çatdırıb. Yuri Maksimovun yetirmələri 2018-ci ildə keçirdiyi bütün matçlarda rəqib qapısına yol tapıb. "Neftçi" isə 8 oyundan sonra yenilərək ən azı bir günlük 3-cü pilləyə yüksəlmək şansını itirib.
Mükafatlara iddialı "Qəbələ” çempionatın autsayderi "Kəpəz”i qəbul edib. Roman Qriqorçukun yetirmələri 5 oyunluq qələbə həsrətini darmadağınla qırıb. I dövrədə evdə bu rəqibə uduzan "qırmızı-qaralar” doğma azarkeşlər önündə həmin məğlubiyyətin əvəzini çıxıb - 3:0.
Hər 3 qol ilk yarıda vurub. Hesabı 31-ci dəqiqədə Filip Ozobiç açıb. 8 dəqiqə sonra Stiven Monroz fərqlənib. İlk yarının son dəqiqəsində isə Cavid Hüseynov yekun hesabı müəyyənləşdirib.
Qeyd edək ki, turun ilk oyununda "Qarabağ" "Zirə"ni 2:1 hesabı ilə yenib. Tura sabah keçiriləcək "Sumqayıt" - "Səbail" oyunu ilə yekun vurulacaq.
Topaz Premyer Liqası
IV dövrə, XXV tur
28 aprel
16.00 Keşlə - Neftçi 2:1
Qollar:Vaqif Cavadov, 21. Adrian Skarlatake, 68 - Namiq Ələsgərov, 42.
