Nobel mükafatlı türk yazıçısı Orxan Pamuk yeni roman yazır. Bu barədə yazıçı iki gün öncə ABŞ-da nəşr edilən "New Republic" jurnalına verdiyi müsahibədə bildirib. Onun sözlərinə görə roman İstanbula immiqrasiya haqqındadır: "1950-ci illərin sonu, xüsusən 60-cı illərdə Türkiyənin kasıb bölgələrindən İstanbula köç başlandı. 1950-ci illərin sonundan türk gecəqondu məhəllələri tikilməyə başlandı, 60-cı illərdə onlar çoxaldı. Mədəniyyəti dəyişdirən orta sinif deyil. Bunu edən proletariatdır, daha çox yoxsullardır. Mənim indi araşdırma aparan köməkçilərim var, onlar xalqın arasına çıxır, insanlarla danışır və mənə məlumat verirlər: 1970-ci illərdə küçə alverçiləri, qatıqsatanlar necə idilər, davranışları necə idi. Bax, bu cür xırda detallar. Material toplayanda öz-özümə deyirəm, İlahi, mən ki Stendalın, Balzakın etdiyini edirəm" - deyə yazıçı yazdığı əsər haqqında bildirib.
