UEFA Konfrans Liqasının qrup mərhələsi çərçivəsində "Qarabağ" bu gün növbəti oyununu keçirəcək.
Qaynarinfo xəbər verir ki, Qurban Qurbanovun komandası H qrupundakı 4-cü sınağında Qazaxıstanda "Kayrat"ın qonağı olacaq. Almatı şəhərindəki "Ortalık" stadionunda oynanılacaq qarşılaşma Bakı vaxtı ilə saat 19:30-da başlayacaq. Görüşü moldovalı FIFA referisi Dumitri Muntyan idarə edəcək.
Hazırda 7 xalla 2-ci pillədə qərarlaşan "Qarabağ" pley-offa vəsiqəni təmin etməyə yaxındır. Bunun üçün komanda həm rəqibinə uduzmamalı, həm də qrupun digər görüşünün nəticəsini gözləməlidir.
Konfrans Liqasında qrup qalibləri 1/8 finala yüksəlirlər. 2-ci yeri tutanlar isə Avropa Liqasında öz qrupunu 3-cü sırada tamamlayan kollektivlərlə pley-off matçları keçirirlər.
UEFA Konfrans Liqası
Qrup mərhələsi, IV tur
4 noyabr
19:30. "Kayrat" (Qazaxıstan) - "Qarabağ" (Azərbaycan)
Hakimlər: Dumitri Muntyan, Andrey Bodyan, Viktor Mardari, Vyaçeslav Banari (Moldova).
Almatı, "Ortalık" stadionu.
"Bazel" - 7, "Qarabağ" - 7, "Kayrat" - 1, "Omoniya" - 1
Səbuhi Həsənov
