Avropa Liqasının I təsnifat mərhələsinin "Balzan" - "Neftçi" oyunu Azərbaycanda canlı göstəriləcək.
Qaynarinfo.az xəbər verir ki, Maltada Bakı vaxtı ilə saat 20:00-da başlayacaq görüş "CBC International" telekanalı vasitəsilə canlı yayımlanacaq.
Belə ki, Avropa Liqasının I təsnifat mərhələsinin püşkatma mərasimindən dərhal sonra “Balzan” – “Neftçi” matçının Azərbaycanda canlı yayımlanması istiqamətində 2 klub arasında danışıqlara başlanılmışdı. Dünənə qədər Malta tərəfi “Balzan” – “Neftçi” matçının, ümumiyyətlə, televiziya vasitəsilə yayımlanmayacağını bildirirdi.
Dünən axşam saatlarında isə “Balzan” klubu tərəfindən matçın yerli TVM-2 telekanalında yayımlanacağı bildirildi. Bundan dərhal sonra “Neftçi” adıçəkilən telekanalla danışıqlara başladı. Dünəndən davam edən danışıqlar bir neçə saat bundan əvvəl müsbət nəticələndi və “Neftçi” TVM-2 telekanalı ilə müqavilə imzalayaraq matçın Azərbaycanda yayımlanmasının maliyyə tərəflərini öz üzərinə götürdü.
Onu da bildirək ki, bu telekanal peyk antenasında göstərir. Lakin bu telekanala internet vasitəsilə də baxmaq mümkündür (http://cbc.az/az/live).
Qeyd edək ki, "Bakcell Arena"da keçiriləcək və saat 21:00-da başlayacaq "Qəbələ" - "Samtredia" (Gürcüstan) oyunu isə "CBC Sport" telekanalı vasitəsilə yayımlanacaq.
Qaynarinfo.az
