"Qarabağ" Avropa Liqasının qrup mərhələsində İtaliyanın "Fiorentina", Yunanıstanın PAOK və Çexiyanın "Slovan" klubları ilə birlikdə J qrupunda mübarizə aparacaq.
Qaynarinfo.Az bu komandanın rəqibləri haqda ətraflı məlumatı təqdim edir.
“Fiorentina” (İtaliya)
“Fiorentina” klubu 1926-cı ildə yaradılıb və İtaliyanın Florensiya şəhərini təmsil edir. Komanda indiyə qədər ikiqat İtaliya çempionu, 6 dəfə İtaliya kuboku və 1 dəfə də İtaliya Superkubokunun qalibi olub. “Fiorentina” 2 dəfə UEFA kubokunun finalında iştirak edib. Ötən mövsümü isə İtaliya Seriya A-da V pillədə başa vurub və Avropa Liqasının qrup mərhələsinə birbaşa vəsiqə qazanıb. “Fiorentina”nın ləqəbi isə “bənövşəyilər”dir. Komanda ev oyunlarını 47282 nəfərlik tutuma malik olan “Artemio Franki” stadionunda keçirir. Komandanın hazırda baş məşqçisi portuqaliyalı Paulu Souzadır və “Fiorentina” hazırda UEFA klubların reytinq sıralamasında 34-cü pillədə qərarlaşıb. Rəqibin hazırki heyətində Argentina, Polşa, Sloveniya, Çili, Xorvatiya, İspaniya kimi ölkələri təmsil edən futbolçular çıxış edir.
PAOK (Yunanıstan)
PAOK-un əsası 1877-ci ildə, İstanbulda qoyulub. Ancaq klub həmin illərdə futbol yox, idman klubu kimi fəaliyyət göstərirdi. "Ağ-qaralar" türklərlə yunanlar arasında müharibə başladıqdan sonra Salonikə köçməyə məcbur olur. 1926-cı ildə isə futbol klubu kimi fəaliyyət göstərməyə başlayır. Komandanın adı 4 sözün birləşməsindən yaranıb. PAOK - Panthessalonikeios Athlitikos Omilos Konstantinoupoliton (Konstantinopolun Pan-Saloniki İdman Klubu). Klub Yunanıstan nəhənglərindən sayılmasa da, bu ölkənin sayılıb-seçilən komandalarındandır. "Ağ-qaralar" 2 dəfə Yunanıstan çempionu olmaqla yanaşı, 4 dəfə də ölkə kubokuna sahib çıxıblar. Rəqib ötən mövsüm Yunanıstan Superliqasını IV pillədə başa vurub. Komandanın baş məşqçisi serbiyalı Vladimir İviçdir. Rəqibin heyətində yunanıstanlı futbolçular çoxluq təşkil etsə də, Braziliya, İspaniya, Argentina kimi ölkələrdən də legioner futbolçuları var. Komanda ev oyunlarını 28700 yerlik "Tumba" stadionunda keçirir. PAOK-un ev oyunlarında bir qayda olaraq anşlaq olur. PAOK UEFA klublarının reytinq sıralamasında 67-ci pillədə qərarlaşıb. Rəqib bu mövsüm Avropa Liqasının pley-off mərhələsində mübarizəyə başlayıb və bu mərhələdə Gürcüstanın "Dinamo" klubunu 2 oyunun nəticəsinə görə 5:0 hesabıyla məğlub edərək mübarizədən kənarlaşdırıb.
“Slovan” (Liberets, Çexiya)
“Slovan” klubu 1958-ci ildə yaradılıb və Liberets şəhərini təmsil edir. Rəqib ev oyunlarını 9900 nəfərlik tutuma malik olan “U Nisı” stadionunda keçirir. “Slovan” 3 qat Çexiya çempionudur və 2 dəfə də ölkə kubokunun qalibi olub. Ötən mövsüm isə çempionatın bürünc mükafatçısı olub. Komandaya çexiyalı Yindrjix Trpişovski rəhbərlik edir. Komandanın heyəti əsasən yerli futbolçulardan ibarətdir, cəmi 5 legioner futbolçusu var (2-si Slovakiya, 2-si Rusiya və 1-i isə Nigeriyanı təmsil edir). Liberets təmsilçisi hazırda UEFA klubların reytinq sıralamasında 81-ci pillədə qərarlaşıb. Bu mövsüm Avropa Liqasının III təsnifat mərhələsindən mübarizəyə başlayıb. Bu mərhələdə Avstriyanın "Admira", pley-offda isə Kiprin AEK komandasını mübarizədən kənarlaşdırıb.
Qaynarinfo.Az
