Son dəyişiklikdən sonra bu vətəndaşlar da pensiya ala biləcəklər - Deputat

Qaynarinfo xəbər verir ki, bunu deputat Vüqar Bayramov Azərbaycan Prezidentinin təsdiq etdiyi "Əmək pensiyaları haqqında” Qanununda yeni dəyişikliklərə münasibət bildirərkən deyib. Deputat yeni dəyişikliklərin pensiyaçılar üçün nə vəd etməsi sualına aydınlıq gətirib:

"Mövcud qanunvericilikdə pensiya yaşına çatan və 2006-2008-ci illər aralığında kapital məbləğindən asılı olmayaraq, fərdi şəxsi hesabının sığorta hissəsində pensiya kapitalı olan şəxslərə pensiya təyin edilərkən 2006-cı il yanvarın 1-dək olan sığorta stajı 25 il, 2023-cü ildən etibarən isə hər təqvim ili üçün 1 il azaldılmaqla hesablanır. Həmin güzəştin müddəti gələn ilin yanvarında başa çatırdı. Dünən təsdiq olunan dəyişikliklər ilə pensiya amnistiyası daha 3 il uzadılır”.

Vüqar Bayramov bildirib ki, mövcud qanunvericiliyə əsasən, yaşa görə pensiya almaq üçün ya 25 il ştaj və ya minimum pensiya kapitalı tələb olunur:

"Ancaq, əgər vətəndaş 2018-ci ilinin iyulun 1-dək hətta 1 manat pensiya kapitalına malik olubsa, o ştaj müddətindən asılı olmayaraq, pensiya almaq hüququ əldə edir. Belə ki, bu zaman onun 2006-cı ilədək olan ştajı 25 il hesab olunur. 2026-cı ildən sonra isə hər təqvim ili üçün 1 il azaldılmaqla hesablanır”.