UEFA tərəfindən cəzalandırıldığı üçün avrokuboklarda çıxış etməyəcəyi dəqiqləşən Bakının "İnter" klubu növbəti mövsümün hazırlıqlarını Türkiyədə keçirəcək.
Qaynarinfo.az-ın klubdan əldə etdiyi məlumata görə, komanda ilk toplanışını Ərzurumda, 2-ci hazırlıq prosesini isə Ankaradakı Kızılcahamamda keçirəcək.
Əsas yoxlama oyunları iyulun 18-30-u aralığında baş tutacaq Kızılcahamam toplanışında olacaq. Orda 5 yoxlama oyununun keçirilməsi nəzərdə tutulub. Təşkilatçılarla bağlanan müqaviləyə görə, rəqiblərdən minimum 2-si Türkiyə Superliqasında çıxış edən komandalar olacaq.
Bu arada "İnter" heyətinə daha bir futbolçunu qatıb. Klub "Xəzər Lənkəran"ın əsas komandasının dağılmasından sonra boşda qalan qapıçı Orxan Sadıqlını 1 illik müqavilə ilə heyətinə cəlb edib. Bu isə o deməkdir ki, 2009-cu ildən "İnter"də çıxış edən Gürcüstan millisinin sabiq qapıçısı 36 yaşlı Georgi Lomaya komandadan ayrılıb. Gürcülərdən mərkəz müdafiəçisi Zurab Xizanişvilinin də yol üstdə olduğunu bildirək.
Qaynarinfo.az
