2 saylı Cəzaçəkmə Müəssisəsində həbsdə olan bloger Rəşad Ramazanov "karser"ə salınıb.
Qaynarinfo.Az xəbər verir ki, bu barədə hüquq müdafiəçisi Bəşir Süleymanlı özünün "facebook" səhifəsində məlumat yayıb.
Hüquq müdafiəçisi yazır: "Rəşad Ramazanovun həyat yoldaşı Könül İsmayılova bu gün səhərdən 2 Saylı Cəzaçəkmə Müəssisəsində onunla görüşməyə cəhd etsə də, görüş verilməyib və 15 günlük karsa salındığı bildirilib”.
Hüquq müdafiəçisi daha sonra Rəşad Ramazanovun karsa salınmasının səbələrinə toxunub: "Həyat yoldaşı Könül xanım bildirib ki, Rəşada xaricdən gələn açıqcaları verməkdən imtina ediblər. O da buna etirazını bildirib. Ola bilsin ki, karsa da bu səbəbdən salınıb”.
Bəşir Süleymanlı statusunda onu da qeyd edir ki, Cəzaçəkmə Müəsisəsinin rəhbərliyi bununla bağlı heç bir açıqlama vermir.
2013-cü il mayın 9-da həbs olunan bloger Rəşad Ramazanov narkotik ittihamı ilə 9 il azadlıqdan məhrum edilib.
Blogerin "facebook"da Azərbaycan hakimiyyətinin ünvanına kəskin tənqidlər etdiyinə görə həbs olunduğunu bildirir.
"Amnesty İnternational" beynəlxalq hüquq müdafiə təşkilatı Rəşad Ramazanovu "Vicdan məhbusu” elan edib.
Qaynarinfo.Az
