Bu gün futbol üzrə Azərbaycan Premyer Liqasının XXX turu çərçivəsində "Zirə" klubu doğma meydanda "Xəzər Lənkəran"ı qəbul edib.
Oyunun ilk hissəsi heç-heçə başa çatıb.
İkinci hissəyə meydan sahibləri daha fəal başlayıb. Matçın 63-cü dəqiqəsində Nelson Bonilya komandasını hesabda önə çıxarıb - 1:0. Premyer Liqanın bombardirlər siyahısına başçılıq edən salvadorlu hücumçu qol sayını 14-ə çatdırıb. Qalan vaxta oyunda qol vurulmayıb və "Zirə" aktivinə 3 xal əlavə edərək 59 xalla turnir cədvəlindəki ikincilik mövqeyini qoruyub.
"Xəzər Lənkəran" isə 30 oyundan sonra 14 xalla 9-cudur.
Qeyd edək ki, turun son oyununda AZAL "Sumqayıt"ı qəbul edəcək.
