Avrokuboklarda ən böyük hesablı məğlubiyyət acısı dadan klubumuz hazırda tarixin yaddaşına köçən Buzovna təmsilçisi "Xəzri” olub. Polşa təmsilçisi "Hutnik”ə ümumi hesabda 11:2 məğlub olan təmsilçimizlə ilk oyunda qapıçının fərqlənməsi diqqət çəkməyə bilməz.
Qaynarinfo.Az xəbər verir ki, Krakovda keçirilən ilk matçda fərqlənən rusiyalı qolkiperi sportfm.az saytı tapıb. 52 yaşlı Sergey Şipovski həmin 2 görüş barədə danışıb:
"1996/97 mövsümündə "Xəzri” Buzovna ilə səhv etmirəmsə, UEFA Kuboku çərçivəsində qarşılaşırdıq. İlk matç sizin komanda üçün faciəyə çevrildi. Rəqibimizi Avropada debüt etməsinə peşman etdik. Hətta mən belə qol vurdum. 9:0 hesabı ilə qalib gəldiyimiz görüşdə 8-ci topu penalti ilə mən qapıdan keçirdim. Səfər oyununda isə sizin klubunuz toparlanmışdı və daha yaxşı mübarizə apararaq bizimlə 2:2 hesabı ilə bərabərə qaldı. Azərbaycanlıların heyətində bir neçə texnikalı futbolçu var idi. İndi adlarını xatırlamıram. Cavab matçında onlar bizə başağrısı oldu. Sonra biz "Siqma”nı (Çexiya komandası - red.) məğlub etdik. Bizi bu yarışdan o dövrdə çox güclü olan "Monako” kənarlaşdırdı. Sonra fransızlar yarımfinala qədər irəlilədi”.
Qeyd edək ki, rusiyalı sabiq qapıçı karyerasını bitirdikdən sonra Polşada qalaraq məşqçi kimi çalışır. O, 1996-cı ildə "Hutnik"lə Polşanın bürünc, 2001-ci ildə isə "Poqon"la gümüş medal qazanıb.
Qaynarinfo.Az
