ABŞ-da ötən gün Krista Paykın uğursuz ölümcül inyeksiya proseduru ilə gündəmə gələn edam cəzalarında bu günədək müxtəlif səbəblərdən uğursuz və gözlənilməz hallar qeydə alınıb.

Qaynarinfo dünyanın qanlı edam tarixindən bəzi nümunələri təqdim edir.

Dünən bütün dünyanın diqqət mərkəzində olan Krista Paykın uğursuz edamı bu cür hadisələrin daha əvvəl də baş verib-vermədiyi sualını gündəmə gətirib.

“The New York Post”un hazırladığı icmala görə, Payk ölümcül inyeksiyadan sağ çıxan ilk edam məhbusu olub. Lakin onun hadisəsi elektrikli kresloda bədəni alovlanan məhbuslardan tutmuş, çoxsaylı iynə cəhdlərinə məruz qalan məhbuslara qədər uzanan uzun və dəhşətli uğursuz edamlar tarixinin yalnız son nümunəsidir.

Ən uğursuz cəhdlər dar ağacında baş verib

Ölüm Cəzası İnformasiya Mərkəzinin məlumatına görə, 1890-2010-cu illər arasında ABŞ-da həyata keçirilən bütün edamların təxminən 3 faizi uğursuzluqla nəticələnib.

Bu halların böyük hissəsini 85 uğursuz asılma hadisəsi təşkil edib. Uğursuz asılma cəhdləri arasında 1901-ci ildə qanundan qaçan Tom “Black Jack” Keçemin edamı da var. Keçemin edam zamanı yıxılarkən başı bədənindən ayrılıb. Buna səbəb kimi edamı həyata keçirən şəxslərin məhbusun həbsxanada nə qədər kökəldiyini nəzərə almaması göstərilir.

Alışan başlar

Elektrikli kresloda həyata keçirilən uğursuz edamlar ikinci yerdə qərarlaşıb. Belə hadisələr zamanı bir neçə edam məhbusunun başında yanğın baş verib.

1990-cı ildə Floridada polisi öldürən Cessi Taferonun başı elektrikli kresloda alovlanıb. Buna səbəb kreslonun operatorlarının məhbusun başına taxılan örtüyün içərisinə səhvən keçirici olmayan sintetik süngər yerləşdirməsi olub. Elektrik cərəyanını bədənə ötürmək mümkün olmadığından qısaqapanma baş verib.

Yeddi il sonra Floridada başqa bir məhbusun başı da eyni şəkildə alovlanıb. “Los Angeles Times” qəzetinin 1997-ci ildə dərc etdiyi xəbərdə belə yazılıb: “Pedro Medinanın ölümü səhər saat 07:10-da elan edildi. Lakin bundan əvvəl qoruyucu əlcək geyinmiş həbsxana əməkdaşı edam məhbusunun başından çıxan alovu söndürməyə kömək etdi və ölüm kamerası o qədər tüstü ilə doldu ki, pəncərəni açmaq lazım gəldi.”

“İnsani” edam üsulunun qanlı nəticəsi

Qatilin edam edilməsi üçün müasir və insani üsul kimi nəzərdə tutulan ölümcül inyeksiya prosedurunda 2010-cu ilə qədər 75 uğursuz cəhd qeydə alınıb.

2014-cü ildə təcavüz və qətldə təqsirli bilinən Kleyton Lokettə ölümcül inyeksiya vurulmağa çalışılarkən iynənin arteriyaya düşməsi nəticəsində həkimin üzərinə böyük miqdarda qan sıçrayıb.

Alabama ştatında yalnız 2022-ci ildə üç uğursuz ölümcül inyeksiya hadisəsi baş verib. Tibbi personal məhbusların damarlarına iynə yeritməyə çalışarkən uğursuz olub. Nəticədə üç məhbus deşilmiş yaralar, göyərmələr və hadisələrdən birində kələ-kötür kəsiklərlə qalıb.

Ölüm Cəzası İnformasiya Mərkəzinin bildirdiyinə görə, başqa bir məhbus isə tibb işçilərinin dəfələrlə iynə vurmağa çalışdığı müddətdə 90 dəqiqə ərzində çarpayıya bağlanmış vəziyyətdə qalıb.

Aydın