Azərbaycan kiçik ölkə olmasına baxmayaraq... - İqtisadçı ekspert

Xəbər verdiyimiz kimi, iyunun 4-də Bakıda regionun enerji sahəsində mühüm hadisəsi olan Bakı Enerji Həftəsi başlayıb.

Qeyd edək ki, Bakı Enerji Həftəsi özündə üç mötəbər tədbiri birləşdirir. Bunlar 29-cu Beynəlxalq Xəzər Neft və Qaz Sərgisi "Caspian Oil&Gas”, 12-ci Xəzər Beynəlxalq Energetika və Yaşıl Enerji Sərgisi "Caspian Power” və 29-cu Bakı Enerji Forumudur.

Hər il keçirilən və özündə üç mühüm tədbiri birləşdirən Bakı Enerji Həftəsi bütün dünyanın enerji sənayesi sahəsində mövcud liderlərini bir araya gətirir. 

Bakı Enerji Həftəsində 37 ölkədən 300-dək şirkət iştirakı təsdiqlənib. Tədbirdə Azərbaycanla yanaşı, ABŞ, Almaniya, Avstraliya, Avstriya, Belarus, Belçika, Bəhreyn, Birləşmiş Ərəb Əmirlikləri, Bolqarıstan, Böyük Britaniya, Çexiya, Çin, Əlcəzair, Finlandiya, Fransa, Gürcüstan, Hindistan, İraq, İsrail, İsveç, İtaliya, Latviya, Qazaxıstan, Qətər, Macarıstan, Monako, Niderland, Norveç, Özbəkistan, Rumıniya, Rusiya Federasiyası, Səudiyyə Ərəbistanı, Sloveniya, Türkiyə, Ukrayna və Yaponiya iştirak edir. Builki sərginin tərkibi iştirakçıların ümumi sayının 15 %-ni təşkil edən yeni şirkətlər hesabına yenilənib. Onların əksəriyyəti Azərbaycanın "yaşıl enerji" sahəsinə yüksək maraq göstərən xarici iştirakçılardır.

Bakı Enerji Həftəsi regionların sosial-iqtisadi inkişafı baxımından da mühüm əhəmiyyət kəsb edir. Bu mənada ölkəmizdə keçirilən bu tədbir birmənalı şəkildə regionların inkişafında da əhəmiyyətli rol oynayacaq. 

Qaynarinfo-ya açıqlamasında iqtisadçı ekspert Fuad İbrahimov bildirir ki, bu kimi layhələr dövlətimizin tanıdılmasında misilsiz əhəmiyyətə malikdir:

"Bakı şəhərində keçirilən istənilən beynəlxalq layihələr ilk növbədə dövlətimizin beynəlxalq layihələrdə iştirakının səviyyəsinin göstəricisidir. Bununla yanaşı, belə layihələr ölkəmizin tanıdılmasında misilsiz əhəmiyyətə malikdir. Azərbaycan enerji təhlükəsizliyi baxımından alternativ və ənənəvi enerjinin dövriyyəyə cəlb edilməsi sahəsində də kifayət qədər təcrübəsi olan bir dövlətdir”. 

 

Ekspert qeyd edir ki, Azərbaycanın karbohidrogen və alternativ enerji ehtiyatlarının ixracı ilə bağlı addımları öz növbəsində regionlarımızın da inkişafına təkan verəcək bir amildir: 

"İstənilən enerji dəhlizlərinin elastikliyi öz növbəsində regionlarımızın da inkişafına təkan verir. Bu mənada Azərbaycan kiçik ölkə olmasına baxmayaraq, ən qüdrətli nüfuza sahib dövlətdir. Ona görə də belə tədbirlərin ölkəmizdə keçirilməsi birmənalı şəkildə bölgələrin inkişafına da ciddi təkan verəcək. Bu kimi tədbirlər sayəsində xarici şirkətlərin bölgələrimizə də diqqəti artacaq”.