“Hökumətimizdən xahiş edirəm tutulanların hamısını azad etsin”.
Bunu Qaynar.info-ya Bəhruz Hacıyevin ölümünə görə Mingəçevir Şəhər Polis Şöbəsinin qarşısında keçirilən aksiyada həbs olunanların sərbəst buraxılması üçün mərhumun atası Dilsuz Hacıyev deyib.
O bildirir ki, oğlunun dəfnində iştirak edənlərə elə oradaca müraciət edib: “Dəfnə gələnlərə qəbiristanlıqda dedim ki, məni istəyənlər evə gəlsin. Sonra mənə zəng gəldi. Dedilər cavanlar şəhərdə aksiya edirlər. Yenə onların yanına getdim və evə dəvət etdim. İndi aksiyadı olub, cavandılar, başları dumanlıdı. Qınalınası deyil. Onlar deyir ki, bu gün Bəhruzun başına gələn, sabah da bizim başımıza gələr. Onları qınamıram. Gərək məni eşidəydilər. Hökumətimizdən də balamın, mənim xətrimə onların azad edilməsini xahiş edirəm”.
Qeyd edək ki, avqustun 20-də axşam saatlarında saxlanılaraq Mingəçevir şəhər Polis Şöbəsinə gətirilən Bəhruz Hacıyev orada ölüb. Onun özünü 3-cü mərtəbədən atdığı bildirilir. Ancaq valideynləri deyilənlərlə razılaşmır, Bəhruz Hacıyevin intihar etməsinə inanmırlar. Avqustun 22-də şəhər sakinləri hadisəyə etiraz əlaməti olaraq polis şöbəsinin qarşısında aksiya keçiriblər. Aksiyada 500-dək adam iştirak edib. Mingəçevir Polis Şöbəsinin rəisi Ələsgər Bədəlov deyib ki, aksiya zamanı 10 nəfər polis əməkdaşı yaralanıb, 21 aksiyaçı həbs edilib. Həbs edilənlər arasında Bəhruz Hacıyevi dindirməyə hazırlaşan polis baş leytenantı Şahlah Şahlarzadə də var.
Ramin Deko
Qaynar.info
