“Çoxsaylı qüvvələrin maraqlarını uzlaşdırmaq o qədər də asan məsələ deyil”
“Partiyalarla danışıqlar aparılır. Mən bu danışıqların gedişatından nikbinəm. Çalışırıq bu prosesi sürətləndirək ki, seçkilərə qədər demokratik düşərgənin bir araya gəlməsini təmin edə bilək”.
Bunu Qaynar.info-ya “El” hərəkatının sədri Eldar Namazov aprelin 23-də Əli Kərimli və İsa Qəmbərlə keçirdiyi görüşlə bağlı təəssüratlarını bölüşərkən deyib.
Onun sözlərinə görə, Milli Şura ilə bağlı mətbuatda müxtəlif fikirlər, problemlər və maneələr haqqında yazılar gedir: “Bu prosesdə iştirak edən insan kimi deyə bilərəm ki, maneələr daha çoxdur. Amma buna baxmayaraq, hesab edirəm ki, proses irəliyə gedir və ümumi razılığa gəlmək üçün kifayət qədər işlər görmüşük. Son mərhələni də uğurla keçə bilsək, yəqin ki, Milli Şuranın yaradılmasını cəmiyyətə elan edə biləcəyik”.
E.Namazov əlavə edib ki, danışıqların daxili mərhələləri var: “Onları bir-bir adlamalıyıq. Əvvəlcə, yəqin ki, Milli Şuranın məqsəd və məramını, daha sonra onun mandatını, fəaliyyət prinsiplərini, son mərhələdə də tərkibini müəyyənləşdirməliyik. Ciddi qurum yaratmaq üçün 5-6 mövzunu müzakirə edib razılığa gəlmək lazımdır. Biz, artıq bu işin böyük hissəsini görmüşük. Bu mənada deyirəm ki, son mərhələdə danışıqlar uğurla davam etsə, biz Milli Şuranın yaradılmasına nail ola biləcəyik”.
“El” sədri danışıqlardan kənarda qalan narazı partiya sədrlərinə də cavab verib: “Bilirsiniz, mətbuatda “3 qüvvə arasında - AXCP sədri Əli Kərimli, Müsavat başqanı İsa Qəmbər, “El” hərəkatının sədri Eldar Namazov arasında danışıqlar gedir” kimi görüntü yaradılır. Bu yanlış təsəvvürdür. Əslində, geniş spektrlə məsləhətləşmələr aparılır. Həmçinin onların da təklifləri nəzərə alınır. Sadəcə, bu prosesi uğurla aparmaq üçün təkcə siyasi iradə deyil, eyni zamanda müəyyən diplomatiyadan da istifadə etmək lazımdır. O mənada ki, çoxsaylı qüvvələrin maraqlarını uzlaşdırmaq o qədər də asan məsələ deyil. Misal üçün deyim ki, vaxtilə qəflətən bəlli oldu ki, Fələstinlə İsrail arasında bir müqavilə imzalanıb. Bu, hamı üçün gözlənilməz xəbər idi. Uzun müddət danışıqlar gedirdi və ictimaiyyət onun detallarından xəbərsiz idi. Yalnız nəticə əldə olunandan sonra ictimaiyyətə məlumat verildi. Milli Şura məsələsində də danışıqlar geniş spektri əhatə edir. Bu danışıqlarda da tam nəticəyə gəlindikdən sonra ictimaiyyətə məlumatlar veriləcək”.
Qeyd edək ki, Müsavat Partiyasının başqanı İsa Qəmbər, AXCP sədri Əli Kərimli və “EL” Hərəkatının lideri Eldar Namazov aprelin 23-də bir araya gələrək Rüstəm İbrahimbəyovun təklif etdiyi Milli Şuranın formalaşdırılması istiqamətində müzakirələr aparıblar.
İlkin
Qaynar.info
