Finlandiya "Lonely Planet" tərəfindən 2026-cı ilin səyahət üçün ən yaxşı 25 istiqamətindən biri elan edilib. Bundan əvvəl, 2025-ci il Dünya Xoşbəxtlik Hesabatına (World Happiness Report) əsasən, Finlandiya səkkizinci il ardıcıl olaraq dünyanın ən xoşbəxt ölkəsi adını qazanıb.

Qaynarinfo xəbər verir ki, bu barədə "Express" yazıb.

"Xoşbəxtlik təkcə var-dövlət və ya iqtisadi artım deyil, bu – etimad, əlaqələr və insanların səni dəstəkləyəcəyinə inamdır. Daha güclü icmalar və iqtisadiyyat istəsək, həqiqətən dəyərli olan şeyə – bir-birimizə sərmayə qoymalıyıq,” deyə "Gallup" şirkətinin icraçı direktoru Con Klifton bildirib.

Finlandiya xoşbəxtliyinin sirri nədədir?

Bildirilir ki, etimad Finlandiya cəmiyyətinin əsasını təşkil edir. Bu ölkədə bir çox uşaqlar, hətta sərt qışların olduğu şimal bölgələrində belə, meşə məktəblərinə gedirlər. Onlara dırmanmağa, tullanmağa, qaçmağa və çox şey etməyə icazə verilir, müəllimlər isə hesab edirlər ki, uşaqlar səhvlərindən öyrənməlidirlər.

"Bu etimad təməlindən əlavə, ölkəyə qarşı böyük bir qürur hissi də var. Finlandiya dünyada ən yüksək səviyyəli milli xidmət göstəricilərindən birinə malikdir. Hər il təxminən 27 min çağırışçı xidmətə başlayır və fin kişilərinin 80%-i hərbi xidmətdən keçir. Bundan başqa, hər il 1500-dən çox qadın da könüllü olaraq xidmətə qoşulur", deyə materialda bildirilir.

Finlərin xoşbəxtliyinin digər vacib amili isə ölkənin təbii gözəlliyidir. Finlandiya "Min göl ölkəsi” kimi tanınır – burada təxminən 200 minə yaxın göl var və ərazisinin təqribən 3/4-ü meşələrlə örtülüdür.

Bundan əlavə, Finlandiya şimali işıqları (aurora borealis) müşahidə etmək üçün ideal yerdir – onları demək olar ki, hər gecə, xüsusilə Laplandiyada görmək mümkündür.

"İstər yay axşamının qızılı işığında fin göllərində qayıqla üzürsünüz, istər İnari bölgəsində maral saxlayan saamı mədəniyyətinin enerjisini hiss edirsiniz, istərsə də Laplandiyanın soyuq havasında it qoşqusu ilə gəzərkən şimali işıqları seyr edirsiniz – fin xoşbəxtliyi təbiətlə harmoniya və öz daxili uşağınızla təmas deməkdir", deyə deyə "Lonely Planet" yazır.

Finlandiya həm də Avropanın ən az əhalisi olan ölkələrindən biridir – burada hər kvadrat kilometrə cəmi 17 nəfər düşür. Müqayisə üçün, Böyük Britaniyada bu göstərici 227 nəfər/km² təşkil edir.

"Lonely Planet" eksperti Kerri Uoker bildirir ki, Finlandiyaya gedərkən Laplandiyadakı saamı mədəniyyəti ilə tanış olmamaq olmaz.

"Oyuncaq Santanı kənara qoyun və İnariyə və ya daha da şimala – Utsyokiyə yollanın. Burada maralların çəkdiyi xizəklərlə gəzə, alov ətrafında oxunan yoik adlı ritmik şeirləri dinləyə bilərsiniz. Arktikanı xaski yarışları, qar ayaqqabıları ilə gəzintilər və buzaltı balıq ovu ilə kəşf edin, sonra isə taxta evcikdə, igluda və ya şimali işıqları seyr etmək üçün şəffaf günbəzli sığınacaqda dincəlin və səssizcə yağan qar dənəciklərinə baxın", deyə o tövsiyə edib.

Məlumdur ki, saamlar Finlandiyanın şimal bölgəsi olan Laplandiyada yaşayırlar. Bu region həmçinin İsveç və Norveç ərazilərinə də uzanır. Onların çoxu hələ də ənənəvi maralçılıqla məşğuldur, lakin indi artıq dronlar və qar motosikletləri kimi müasir texnologiyalardan da istifadə edirlər.

Aydın