Yeni arxiv sənədləri Adolf Hitlerin bacısı qızı Geli Raubalın ölüm anında Münhendə olmadığı barədə uzun illər mövcud olmuş versiyanı şübhə altına alıb. Tarixçi Harald Sandner Münhenin dövlət və şəhər arxivlərində Raubalın əvvəllər hesab edildiyindən bir gün əvvəl ölmüş ola biləcəyini göstərən qeydlər aşkarlayıb.
Qaynarinfo xəbər verir ki, araşdırmanın nəticələri barədə "Der Spiegel" nəşri məlumat yayıb.
Uzun müddət Raubalın rəsmi ölüm tarixi 19 sentyabr 1931-ci il hesab olunub. O, Hitlerin Prinzregentenplatzdakı mənzilində ölü vəziyyətdə tapılıb. Yaxınlığında Hitlerə məxsus tapança olub və ölüm səbəbi intihar kimi göstərilib.
Hitler özü həmin gün Nürnberqdə olduğunu iddia edib. Bu fakt onilliklər ərzində onun alibisi kimi qəbul olunub. Lakin Sandnerin aşkar etdiyi ölüm qeydiyyatı kitabında Raubalın cəsədinin sentyabrın 18-də saat 10:15-də tapıldığı göstərilir. Tarixçinin sözlərinə görə, həmin vaxt dərc edilmiş iki nekroloqda da eyni tarix qeyd olunub.
“Əgər sənədlər ölümün həqiqi vaxtını əks etdirirsə, Hitlerin Münhendə olmaması barədə versiya şübhə altına düşür. Sandnerin rekonstruksiyasına görə, sentyabrın 18-də səhər Hitler Münhendə təxminən saat 10:30-dan 12:30-dək davam edən partiya tədbirində iştirak edib və yalnız günün ikinci yarısında Nürnberqə yollanıb. Beləliklə, Hitler şəhəri tərk etdiyi vaxt Raubal artıq ölmüş ola bilər”, deyə nəşrdə qeyd olunur.
Raubalın ölümünün şəraiti tarixçilər arasında mübahisə mövzusu olaraq qalır. Əsas məqamlardan biri ölümcül güllə yarasından sonra cəsədin yarılmasının aparılmamasıdır. Sandner rəsmi sənədlərin sonradan Hitleri qorumaq məqsədilə dəyişdirilmiş ola biləcəyini istisna etmir.
Raubal Hitlerin ögey bacısı Anqelanın qızı idi. Hitler onun həyatının bir çox sahəsinə nəzarət edirdi. Ölümündən az əvvəl Raubalın Vyanaya köçmək planı ilə bağlı onların arasında münaqişə yaranmışdı. Həmin dövrdə onların intim münasibətdə olması barədə də şayiələr yayılmışdı. Tarixçilər bu iddiaların doğruluğunu mübahisəli hesab edirlər.
Yeni sənədlər Hitlerin Raubalın ölümündə iştirak etdiyini sübut etmir. Lakin onlar hadisələrin uzun illər ərzində qəbul edilmiş versiyasının əsas detallarından birini şübhə altına alır.
Aydın
Şərhlər