Son illər ağ saçlar təbii görünüşün bir hissəsi kimi daha çox qəbul edilir. Bir çox qadın saçlarını mütəmadi boyamaq əvəzinə, onların təbii rəngini qorumağa üstünlük verir. Lakin ağ saçlara qulluq zamanı əsas çətinliklərdən biri onların daha nazik və seyrək görünməsidir. Mütəxəssislər düzgün saç kəsiminin bu problemi vizual olaraq azaltmağa kömək etdiyini bildirirlər.
Qaynarinfo xəbər verir ki, bu barədə “Onet Uroda” nəşri saç ustalarının tövsiyələrinə istinadən yazıb.
Londonun “Salon64” salonunun təsisçisi və məşhur saç ustası Riki Uoltersin sözlərinə görə, piqmentini itirmiş ağ saçlar tünd saçlarla müqayisədə daha şəffaf və nazik görünə bilər. Buna görə də saç düzümünün forması və kəsim texnikası xüsusi əhəmiyyət daşıyır.
Qısa saç kəsimləri həcm yaradır
Mütəxəssislər nazik və seyrək görünən saçlar üçün qısa kəsimləri uğurlu seçim hesab edirlər. Çünki saçın köklərə yaxın hissəsi adətən daha qalın, ucları isə daha nazik olur. Qısa saç düzümü ucların seyrək görünməsini azaldaraq daha dolğun görüntü yarada bilər.
Bundan əlavə, saç köklərinə tətbiq edilən həcmverici vasitələr saçların daha dik dayanmasına və yüngül görünməsinə kömək edir. Saça zərər verməyən yumşaq parça bigudilərdən istifadə də tövsiyə olunur.
Bob kəsimi də uğurlu seçimdir
Ağ saçları daha gur göstərmək üçün tövsiyə edilən modellərdən biri də klassik bob saç düzümüdür. Xüsusilə ucları bərabər kəsilmiş bob saçlara daha dolğun görünüş verə bilər.
Saç ustalarının fikrincə, bob kəsimini çolka ilə birləşdirmək alın nahiyəsində saçların daha sıx görünməsinə şərait yaradır. Ancaq saçın həddindən artıq qısaldılması əks effekt verə biləcəyi üçün kəsimin düzgün seçilməsi vacibdir.
Dalğalı və buruq saçlara sahib olanlara isə təbii quruluşu qorumaq məsləhət görülür. Saçları həddindən artıq daramaq və isti fen, düzləşdirici kimi alətlərdən tez-tez istifadə etmək onların elastikliyini azalda bilər.
Digər tərəfdən, mütəxəssislər saçın uclarını düz xətt üzrə kəsməyin də müəyyən hallarda daha qalın görünüş yaratdığını bildirirlər. Bununla belə, ən yaxşı nəticə saçın quruluşuna və sıxlığına uyğun forma seçilməsindən asılıdır.
Beləliklə, düzgün saç kəsimi və uyğun qulluq vasitələri ağ saçların daha həcmli, canlı və baxımlı görünməsinə kömək edə bilər.
Aydın
