2026–2027-ci ilin qış mövsümündə həm dəbli görünmək, həm də soyuq havada rahat olmaq üçün qarderobda bir neçə əsas geyim və aksessuarın olması tövsiyə edilir.
Qaynarinfo xəbər verir ki, bu barədə ukraynalı UNIAN nəşrinə stilist və moda eksperti Qalina Denisük məlumat verib.
Ekspertin sözlərinə görə, qış alış-verişi zamanı yalnız dəb trendlərinə deyil, geyimlərin keyfiyyətinə və bir-biri ilə uyğunlaşdırılmasına da diqqət yetirmək lazımdır. O, mövsüm üçün altı əsas seçim təklif edib.
1. İsti palto və ya dublyonka
Stilist qış qarderobunu üst geyimindən başlamağı məsləhət görür. Çiyin xətti aydın görünən, beldən oturan və ya xalat formasında olan paltolar, eləcə də dublyonkalar mövsümün uyğun seçimləri sırasındadır. Neytral rənglərdə olan keyfiyyətli modelləri müxtəlif geyimlərlə uyğunlaşdırmaq daha asandır.
2. Rahat və dəbli çəkmələr
Dizədək uzanan çəkmələr, jokey üslublu modellər və qalın altlıqlı botinkalar qış üçün tövsiyə olunur. Çox gəzənlər üçün rahat altlıq və keyfiyyətli materiallar xüsusilə əhəmiyyətlidir. Çəkmələri ətək və donlarla, botinkaları isə cins şalvar və geniş biçimli şalvarlarla uyğunlaşdırmaq mümkündür.
3. Keyfiyyətli trikotaj sviter
Yun, kaşmir və keyfiyyətli qarışıq materiallardan hazırlanan həcmli sviterlər qış qarderobunun əsas elementlərindəndir. Onları cins şalvar, klassik şalvar, ətək və köynəklərlə birləşdirmək olar. Neytral rənglər universal seçim olsa da, parlaq rəngli sviterlər də gündəlik obrazlara fərqlilik qata bilər.
4. İsti və həcmli şərf
Şərf həm soyuqdan qoruyur, həm də geyimə əlavə rəng və faktura verir. Bordo, qırmızı və zeytuni rənglərdə olan iri şərflər klassik palto ilə maraqlı uyğunluq yarada bilər. Daha sadə görünüş sevənlər isə üst geyimlərinə yaxın rənglər seçə bilərlər.
5. Üz quruluşuna uyğun baş geyimi
Toxunma papaqlar, beretlər, kepkalar, kaporlar və yaylıqlar qış mövsümündə fərqli seçimlər təklif edir. Stilist dəbə uyğun gələn hər hansı modeli düşünmədən almaqdansa, üz quruluşuna və üst geyiminə yaraşan variantı seçməyi tövsiyə edir.
6. Dəri əlcəklər
Qara, qəhvəyi və bordo rəngli dəri əlcəklər qış obrazını tamamlayan aksesuarlardandır. Onlar palto və dublyonkalarla uyğunlaşır. Bununla belə, seçim zamanı yalnız görünüşə deyil, əlcəklərin soyuq havada kifayət qədər isti saxlamasına da diqqət yetirmək lazımdır.
Stilist qış alış-verişindən əvvəl mövcud qarderobu nəzərdən keçirməyi və həqiqətən çatışmayan əşyaları müəyyənləşdirməyi məsləhət görür. Onun fikrincə, dəbli görünmək üçün bütün geyimləri yeniləmək vacib deyil; bir neçə düzgün seçilmiş geyim və aksessuar da qarderoba yeni görünüş qazandıra bilər.
Aydın
