Məşhur saç ustası, Kristin Kavallari, Eşli Tisdeyl və Prəyanka Çopra ilə işləyən Aleks Pardo saç kəsimi zamanı yol verilən hansı səhvlərin incə saçları həcmdən məhrum etdiyini və onların vizual olaraq daha seyrək görünməsinə səbəb olduğunu açıqlayıb. O, həmçinin saçların daha sıx görünməsinə kömək edən saç düzümü və formaverici vasitələrin seçilməsi ilə bağlı tövsiyələrini bölüşüb.
Qaynarinfo xəbər verir ki, bu barədə “Parade” jurnalı yazır.
Stilistin sözlərinə görə, ən çox rast gəlinən səhvlərdən biri saçda həddindən artıq çox qat yaratmaqdır. Çoxqatlı saç kəsimləri üzü gözəl çərçivəyə alsa da, incə saçlarda əks effekt yarada bilər. Usta saçın, xüsusilə də ucların həcmindən həddindən artıq götürdükdə, tellər seyrək görünür və sıxlığını itirir. Pardo qeyd edir ki, saç kəsimi zamanı seyrəltmə qayçılarından həddindən artıq istifadə edildikdə də eyni problem yaranır.
İkinci səhv saçların həddindən artıq teksturalaşdırılmasıdır. Ülgüclə kəsmək və telləri çox seyrəltmək incə saçları cansız edə, ucların isə seyrək və pırpızlı görünməsinə səbəb ola bilər. Nəticədə, saçın uzunluğu uyğun olsa belə, saç düzümü arzuolunandan daha az həcmli görünür.
Pardo bunun əvəzinə saçların sıxlığını qoruyan, aydın və düz kəsim xəttinə malik modelləri seçməyi tövsiyə edir. Onun sözlərinə görə, incə saçlı insanlar üçün klassik bob, uzadılmış bob və eyni uzunluqda kəsilmiş saç modelləri xüsusilə uyğundur. Saçlara qatlar vasitəsilə hərəkətlilik vermək istədikdə isə ustadan qatları minimum səviyyədə saxlamağı və ucların həcmini azaltmayacaq şəkildə kəsməyi xahiş etmək daha yaxşıdır.
Saçlara qulluq və forma vermək üçün istifadə olunan vasitələrin seçimi də az əhəmiyyət daşımır. Stilist xəbərdarlıq edir ki, qatı kondisionerlər, sıx teksturalı maskalar, ağır yağlar və saçda qalan qulluq vasitələri incə saçları ağırlaşdıra, nəticədə onların dolğunluğunu daha tez itirməsinə səbəb ola bilər. Xüsusilə kondisioner tərkibli vasitələri birbaşa saç diblərinə həddindən artıq miqdarda çəkmək məsləhət görülmür.
Saçların yüngüllüyünü qorumaq üçün Pardo yüngül tərkibli məhsullara üstünlük verməyi məsləhət görür. Kondisionerləri və saçları hamarlayan vasitələri əsasən saçın uzunluğu boyunca, xüsusilə orta hissəsinə və uclarına çəkmək daha məqsədəuyğundur.
Evdə saçlara əlavə həcm vermək üçün saç dibləri üçün nəzərdə tutulmuş muss və ya həcm spreylərindən istifadə etmək olar. Fenlə qurudarkən stilist saçları təbii düşmə istiqamətinin əksinə doğru yönəltməyi tövsiyə edir. Bu üsul saç diblərini qaldırmağa kömək edir. Saçların yuyulması arasındakı müddətdə quru şampun və ya teksturalaşdırıcı spreydən istifadə etmək tellərin daha dolğun görünməsinə və saç düzümünün formasını daha uzun müddət saxlamasına kömək edə bilər.
Pardo həmçinin etiraf edib ki, bəzən saçlarını yuduqdan sonrakı ilk gün elə həmin vaxtdan saç diblərinə quru şampun vurur. Bu, saçların tez yağlanmasını ləngitməyə və həcmini qorumağa kömək edir.
Aydın
