Ermənistan parlamentində hakim Vətəndaş Müqaviləsi Partiyası ilə müxalifət arasında qarşıdurma yenidən güclənib. Siyasi analitiklərin fikrincə, parlamentdə səslənən ittihamlar təkcə daxili siyasi polemika deyil, həm də Ermənistanın təhlükəsizlik siyasəti və Azərbaycanla sülh prosesinə dair fərqli baxışların toqquşmasının göstəricisidir.

Müxalifəti təmsil edən deputat Anna Qriqoryanın hakimiyyət nümayəndələrini seçki kampaniyası dövründə cəmiyyəti müharibə təhlükəsi ilə qorxutmaqda ittiham etməsi Ermənistan siyasətində uzun illər müşahidə olunan bir tendensiyanı yenidən gündəmə gətirib. Analitiklər qeyd edirlər ki, Ermənistanın müstəqillik tarixində təhlükəsizlik və müharibə mövzusu demək olar ki, bütün seçkilərdə əsas siyasi alətlərdən biri kimi istifadə olunub.

Hakim partiyanın nümayəndəsi, parlament sədrinin müavini Ruben Rubinyanın "sentyabrda müharibə gözlənilmir" açıqlaması isə siyasi müşahidəçilər tərəfindən həm daxili auditoriyaya, həm də xarici tərəfdaşlara ünvanlanmış mesaj kimi qiymətləndirilir. Onun sözlərinə görə, hakimiyyət heç vaxt müxalifətin qələbəsinin avtomatik müharibəyə səbəb olacağını deməyib, söhbət yalnız müxalifətin irəli sürdüyü siyasətin mümkün nəticələrindən gedib.

Siyasi ekspertlər hesab edirlər ki, bu polemikanın arxasında daha mühüm məsələ dayanır.

Baş nazir Nikol Paşinyan hökuməti son illərdə Azərbaycanla sülh müqaviləsinin imzalanmasını prioritet elan edib. Rəsmi İrəvan artıq bir neçə dəfə Azərbaycanın ərazi bütövlüyünü, o cümlədən Qarabağın Azərbaycanın tərkib hissəsi olduğunu tanıdığını bəyan edib. Bunun fonunda müxalifətin bir hissəsi hökuməti güzəştlərdə ittiham edir və daha sərt xətt tərəfdarı kimi çıxış edir.

Analitiklərin fikrincə, məhz bu fikir ayrılığı hakimiyyətin seçki kampaniyasında təhlükəsizlik məsələlərinə xüsusi həssaslıqla yanaşmasına səbəb olub. Çünki Ermənistan cəmiyyətində 2020-ci ilin 44 günlük müharibəsi və 2023-cü ildə Azərbaycanın Qarabağda həyata keçirdiyi lokal antiterror tədbirlərindən sonra təhlükəsizlik məsələləri ən həssas mövzulardan biri olaraq qalır. Bu səbəbdən müharibə ehtimalı ilə bağlı istənilən siyasi bəyanat ictimai rəydə ciddi rezonans doğurur.

Siyasi təhlilçilər hesab edirlər ki, Ruben Rubinyanın "konstitusion çoxluq olmasa belə, sülh prosesi davam edəcək" açıqlaması hakimiyyətin əvvəlki ritorikasında müəyyən korrektələrin edildiyini göstərir. Əgər seçkiqabağı dövrdə siyasi sabitliyin pozulmasının təhlükəsizlik risklərini artıracağı vurğulanırdısa, indi hakimiyyət parlament çoxluğunun azalmasının sülh gündəliyini tam dayandırmayacağını bəyan edir. Bu isə beynəlxalq tərəfdaşlara Ermənistanın siyasi kursunun dəyişməyəcəyi mesajı kimi də qiymətləndirilir.

Ekspertlər diqqətə çatdırırlar ki, hazırda regionda genişmiqyaslı hərbi əməliyyatların başlanacağına dair açıq əlamətlər müşahidə olunmur. Azərbaycan və Ermənistan arasında sərhədlərin delimitasiyası üzrə komissiyaların fəaliyyəti davam edir, sülh sazişi üzrə danışıqlar tam dayanmasa da, mürəkkəb mərhələdədir. Bununla yanaşı, kommunikasiyaların açılması, Konstitusiyada mümkün dəyişikliklər və yekun sülh müqaviləsinin imzalanması kimi əsas məsələlər hələ də tam həllini tapmayıb.

Analitiklər hesab edirlər ki, Ermənistan daxilində sülh prosesi artıq xarici siyasət mövzusundan daha çox daxili siyasi mübarizənin predmetinə çevrilib. Hakimiyyət bunu regional sabitlik və iqtisadi inkişaf üçün yeganə yol kimi təqdim etdiyi halda, müxalifət hökuməti milli maraqlardan geri çəkilməkdə ittiham edir. Parlamentdə baş verən son debat da məhz bu siyasi qarşıdurmanın davamı kimi qiymətləndirilir.

Ermənistan parlamentində yaşanan mübahisə göstərir ki, ölkədə qarşıdakı siyasi proseslərdə təhlükəsizlik və müharibə mövzusu yenə də əsas gündəm olaraq qalacaq. Siyasi analitiklərin fikrincə, İrəvanda gedən daxili siyasi mübarizə təkcə hakimiyyət və müxalifət arasında rəqabət deyil, həm də Ermənistanın gələcək xarici siyasət kursu, Azərbaycanla münasibətlərin perspektivi və Cənubi Qafqazda formalaşan yeni geosiyasi reallıqlar uğrunda mübarizədir.

Qeyd edək ki, Ermənistan parlamentində hakim Vətəndaş Müqaviləsi Partiyası ilə müxalifət arasında seçkiqabağı səsləndirilən müharibə xəbərdarlıqları ətrafında gərgin mübahisə yaşanıb. Parlamentin iclasında müxalif deputat Anna Qriqoryan hakim partiyanın seçki kampaniyası zamanı konstitusion çoxluq əldə olunmayacağı təqdirdə sentyabrda dağıdıcı müharibənin baş verəcəyi barədə səsləndirdiyi bəyanatları xatırladıb.

Siyasət şöbəsi