Avropanın ən qədim kral ailələrindən biri olan Norveç kral ailəsində yeni dövr başlayıb. Norveç kralı V Haraldın 28 avqust 2026-cı ildə vəfatından sonra taxta onun oğlu VIII Haakon keçib.

Qaynarinfo xəbər verir ki, 53 yaşlı hökmdar atasının vəfatından sonra taxtı qəbul edib. Tam adı Haakon Maqnus olan kral Glücksburg sülaləsinin dördüncü nəslini təmsil edir. Ölkəni qarşıdakı dövrdə gözləyən dəyişiklik isə daha böyük və tarixi xarakter daşıyır.

Norveçin sonuncu qadın hökmdarı 600 ildən əvvəl taxtda olub. Yeni kral Haakon hökmdar kimi and içərkən onun 22 yaşlı qızı Vəliəhd şahzadə İnqrid Aleksandra da taxtın varisi statusu ilə tarixə düşüb. Gələcəkdə kraliça olduqda isə 600 ildən artıq davam edən fasilə başa çatacaq və ölkədə yeni dövr başlayacaq.

Bu yeni dövr sentyabrın 1-də Kral Haakonun Norveçin ən yüksək qanunverici orqanı və parlamenti olan Stortinq qarşısında konstitusiyaya sadiqlik andı içməsi ilə başlayıb. Bununla İnqrid Aleksandra rəsmi olaraq taxtın varisi statusunu əldə edib.

Vəliəhd şahzadə İnqrid Aleksandra atasının şifahi andından sonra onun statusunu rəsmən təsdiqləyən yazılı bəyanat da təqdim edib. Bu sənəd atasının səfərdə olduğu, vəzifəsini icra edə bilmədiyi və ya ölkədə olmadığı hallarda onun qanuni şəkildə naib kimi ölkəni idarə etməsinə imkan verir.

İnqrid Aleksandranın taxtın varisi kimi tarixə düşməsinin bir neçə səbəbi var. O, Norveçin müasir monarxiya tarixində taxtın varisi elan edildiyi zaman artıq 18 yaşını tamamlamış ilk şəxsdir.

İnqrid Aleksandranın atası və babası da daxil olmaqla, yaxın dövrdəki vəliəhdlər ataları hökmdar olduqda hələ yetkinlik yaşına çatmadıqları üçün andlarını 18 yaşlarında içiblər.

Vəliəhd şahzadə İnqrid Aleksandra həmçinin ölkənin 1990-cı ildə varislik qanunlarına etdiyi dəyişiklikdən təsirlənən ilk Norveç kral ailəsi üzvüdür. Həmin dəyişikliklə kişilərə üstünlük verilməsi prinsipindən imtina edilərək, cinsindən asılı olmayaraq ilk doğulan uşağın taxta keçməsini nəzərdə tutan “mütləq primogenitura” prinsipi tətbiq olunub.

Bu dəyişiklik sayəsində 20 yaşlı kiçik qardaşı şahzadə Sverre Maqnus dünyaya gələndə İnqrid Aleksandra taxt varisliyi sırasındakı mövqeyini itirməyib. Kraliça Mette-Maritın Kral Haakonla evlənməzdən əvvəlki münasibətindən dünyaya gələn və taxt varisliyi sırasında yer almayan Marius Borq Höybi adlı böyük oğlu da var.

Kral Haakonun Märtha Luiza adlı böyük bacısı var. Lakin Haakon qanun dəyişikliyindən əvvəl doğulduğu üçün taxt varisliyi sırasında bacısını qabaqlayıb.

İnqrid Aleksandra gözlənildiyi kimi taxta çıxarsa, Norveçin 600 ildən artıq müddətdə ilk qadın hökmdarı olacaq.

Norveçin sonuncu qadın hökmdarı 1388-1412-ci illərdə hakimiyyətdə olmuş kraliça Marqaret olub. Vəliəhd şahzadə İnqrid Aleksandra Avropada gələcək kraliça olacaq bir sıra qadın varislərdən biridir və onlarla yaxın münasibətlərə malikdir. Daha əvvəl onun Belçika şahzadəsi Elizabet və Niderland şahzadəsi Katarina-Amaliya ilə “WhatsApp” qrupunda olduğu da məlum olub.

Hazırda tələbə olan İnqrid Aleksandra bu yaxınlarda Oslo Universitetində təhsilini davam etdirməyə başlayıb. O, anasının səhhəti ilə bağlı problemləri, o cümlədən iyun ayında keçirdiyi ağciyər transplantasiyası səbəbindən ailəsinə daha yaxın olmaq üçün bu ilin əvvəlində Avstraliyadan Norveçə qayıdıb.

İnqrid Aleksandra Avstraliyada Sidney Universitetində beynəlxalq münasibətlər və siyasi iqtisadiyyat üzrə üçillik bakalavr təhsili alırdı.

Aydın