"Gürcüstanda seçkidən
sonra hansısa formada böyük dəyişikliklərin olacağı ehtimalı azdır”.
Bunu Qaynarinfo-ya
açıqlamasında analitik İlkin Həsənli Gürcüstanda keçirilən parlament seçkilərinin
nəticələrindən danışarkən deyib. Analitik hesab edir ki, iqtidar partiyası
seçkidən sonra çox ağıllı davranır:
"İndiki mərhələdə
iqtidarın atdığı addımlar həm daha ehtiyatlıdır, həm də daha çox hesablanmış
addımlardır. Bu baxımdan böyük dəyişikliklərin olması görünmür. Amma müəyyən
güzəştlərə gediləcəyi, geri addım atılacağı ehtimalları da mövcuddur”.
İlkin Həsənli
bildirib ki, seçkidən sonra Gürcüstanda müxalifətin hansısa formada etiraz
aksiyası keçirəcəyi və hökümətə qarşı sərt tələblərlə çıxış edəcəyi ehtimalı
onsuz da mövcud idi:
"Yəni, proses gözlənilməz
olmadı. Saakaşvilinin də geri dönmə bəyanatının səsləndirməsi və seçkiyə kimi
olan müddət ərzində baş verən proseslərə nəzər salanda bu, gözlənilən idi.
Seçki sisteminin dəyişdirilməsi prosesi həm müxalifətə ümid verirdi ki,
parlamentdə daha çox yer əldə edəcək, həm də iqtidardan ayrılan müəyyən narazı
qüvvələr var ki, onlar iqtidarın özü üçün problemlər yaradırdılar. İndiki dövrdə
müxalifətin atdığı ən ağıllı addımlardan biri əvvəlki dövrlərdə olduğu kimi
etiraz aksiyalarını parlamentin qarşısında deyil, bir başa Mərkəzi Seçki
Komissiyasının qarşısında keçirir. Bu da müxalifət tərəfindən atılan ən önəmli
addımlardan biridir”.
Bəz, proseslər bundan
sonra necə olacaq?
Analitik qeyd edib
ki, hansısa hadisələrin olacağı ehtimalı hələ ki, azdır:
"Amma bu o demək
deyil ki, Gürcüstanda hansısa formada mühüm dəyişikliklər olsun. Bir şey də var
ki, hələ Gürcüstanda seçkinin nəticələri tam müəyyənləşməyib. Hələ majoritar
dairələrdə müəyyən pozuntular var. O pozuntularla bağlı yenidən seçki keçirilməlidir.
Bununla belə, müxalifətin hansısa etiraz aksiyaları ilə bağlı böyük dəyişikliklər
əldə edəcəyi ehtimalı hələ ki azdır”.
Qeyd edək ki,
oktyabrın 31-də parlament seçkiləri keçirilib. Gürcüstanın Mərkəzi Seçki
Komissiyasının ilkin nəticələrə əsasən, Gürcü Arzusu Partiyası 49,32%, Vahid
Milli Hərəkat Partiyası 25,94%, Avropalı Gürcüstan Partiyası isə 3,77% səs əldə
edib.
Bahar Rüstəmli
