"Meyitlər, hərbi
əsirlər dəyişdiriləndən sonra onlar Azərbayacana guya güc göstərmək üçün nəsə
etməyə çalışacaqlar".
Bunu Qaynarinfo-ya
açıqlamasında hərbi ekspert Üzeyir Cəfərli Azərbaycan və Ermənistan arasında
humanitar məqsədlərlə atəşkəsin imzalanması ilə bağlı qərarı şərh edərkən
deyib. Onun fikrincə, hazırda imzalanan sənədlə bağlı Azərbaycan rəsmiləri müəyyən
məlumatlar verəcəklər:
"Bu gün Azərbaycan
Xarici İşlər Nazirliyi də rəsmi olaraq bildirdi ki, atəşkəs humanitar məqsədlər
üçün elan olunub. Humanitar məqsəd ondan ibarətdir ki, döyüş meydanında qalan cəsədlərin
verilməsi. Saat 12:00-dan həmin atəşkəs elan olunur ki, Qırmızı Xac Komitəsi həmin
o meyitlərin, hərbi əsirlərin dəyişilməsində vasitəçilik edir. Azərbaycan tərəfindən
əsirlərin olub-olmaması ilə bağlı məlumat
yoxdur. Əgər belə bir sey olsa, ermənilər göstərərdilər, deyərdilər. Amma ermənilərinn
xeyli hərbi əsirləri var".
Üzeyir Cəfərli
bildirib ki, elan olunan atəşkəslə bağlı ruhdan düşməyə dəyməz:
"Atəşkəsin
konkret detalları haqqında məsələlər hələ razılaşdırılacaq. Yeganə narahatedici
məqam ATƏT-in yenidən məsələyə müdaxiləsidir. Amma Azərbaycan əvvəlki
olmayacaq, onlara o şansı tanımayacaq ki, onlar nəyisə öz bildiyi kimi etsinlər,
nəyisə uzatsınlar. Ordu hazır vəziyyətdədir. Əgər Ermənistan tərəfi saat
12:00-dan sonra baza prinsiplərinə əməl etməyə başlamalıdır - rayonların
boşaldılması, əvvəl 5 rayon, sonra 2 rayonun boşaldılması, insanların ora köçməsi,
sonra isə Dağlıq Qarabağla bağlı məsələlərin həlli... Hesab edirəm ki, 6 punktdan
ibarət olan bu sənəd Azərbaycana yenə də həmin imkanları tanıyır".
Üzeyir Cəfərli hesab
edib ki, Ermənistan darmadığın olmuş ordunu bərpa etməyə çalışacaq:
"Ən azından
meyitlər və hərbi əsirlər dəyişdiriləndən sonra onlar Azərbayacana güc göstərmək
üçün nəsə etməyə çalışacaqlar. Gəlin gözləyək, görək rəsmilərin mövqeyi nədən
ibarət olacaq. Şəxsən mən o qədər də narahatedici bir məqam görmürəm. Qərarı elə
verəcəyik ki, işğal altında olan torpaqlar tezliklə azad olunsun".
Qeyd edək ki, Moskvada
Rusiya, Azərbaycan və Ermənistan Xarici İşlər nazirlərinin üçtərəfli görüşü
keçirilib. Görüşdə Azərbaycan və Ermənistan arasında bu gündən humanitar məqsədlərlə
atəşkəs elan olunur.
Bahar Rüstəmli
