Kanadada
yaşayan Türk toplumuna aid qeyri-hökumət təşkilatları yaydıqları açıqlamada Kanada
hökumətinə Ermənistanla Azərbaycan arasında gedən Dağlıq Qarabağ münaqişəsində
erməni diasporunun oyununa alət olmamaq çağırışı edib.
Qaynarinfo
xəbər verir ki, mərkəsi Torontoda yerləşən Kanada Türk Boyları Asambleyası (Turkic
Assembly of Canada) Ermənistanın Dağlıq Qarabağa hücumlarını sərt şəkildə qınayıb.
Kanada
Türk Boyları Birliyinin yaydığı açıqlamada Ermənistanın 30 ildir davam edən təcavüzkar
davranışının ərazinin sabitliyinə və Azərbaycanın ərazi bütövlüyünə ən böyük təhdid
olduğunu ifadə edərək, Kanadanın Türkiyəyə hərbi texnika ixracatını dayandırmasından
narahatlıq ifadə edilib. Türk və türk əsilli əhalinin Kanadadan təcavüzkarı
mükafatlandırmaqdansa sülhə qatqı göstrəməsini gözlədiyi bildirilib.
Bəyanatda
Ermənistanın Azərbaycan ərazilərinin 20 faizini işğal etdiyi və 1 milyondan çox
azərbaycanlının didərgin düşdüyü xatırladılıb və Kanadadan Ermənistanın dərhal
bu torpaqlardan çəkilməsinə şərait yaradacaq həll yoluna töhfə verməsi istənilib.
Açıqlamada Ermənistanın hücumları ilə Azərbaycanın enerji infrastrukturuna
ziyan vurmağı hədəflədiyi və bu hücumlar səbəbi ilə Avropanı Azərbaycanla birləşdirən
enerji ötürücü xətlərin təhlükəsizliyinin təhlükə altında olduğu vurğulanıb.
Bundan
başqa, mərkəzi Ottavada yerləşən Kanadalı Türklər Şurası (Council of Turkish
Canadians-CTC) da Kanada hökumətini Ermənistan və Azərbaycan arasındakı
böhranda NATO ittifaqının ruhuna uyğun münasibət göstərməyə çağırıb.
Açıqlamada
deyilir: "Kanadadakı erməni diasporu Ottava hökumətini təsir altına almağa
çalışaraq təbliğat aparır. Əslində Cənubi Qafqazdakı qeyri-sabitliyin mənbəyi
Ermənistandır. Kanadanın Türkiyə ilə münasibətlərində NATO ittifaqına layiq bir
şəkildə davranması və Dağlıq Qarabağ münaqişəsinə yanaşdığı kimi yanaşması
lazımdır. Türkiyə Azərbaycanı dəstəkləsə də, mövcud münaqişədə tərəf deyil.
Kanada Türkləri Şurası (CTC) Kanada hökumətinə ermənilərin bu təxribat tələblərinə
məhəl qoymamağı tövsiyə edir. Erməni diaspor təşkilatları Türkiyəyə qarşı
dezinformasiya kampaniyası başladaraq və etnik lobbi fəaliyyəti göstərərək NATO-nun
həmrəyliyi və bütövlüyünü pozur, bu səbəbdən Kanadanın milli maraqlarına zərər
verir”.
Qeyd
edək ki, bazar ertəsi Kanada Xarici İşlər Naziri François-Filip Çampagne yazılı
açıqlamasında Dağlıq Qarabağda davam edən qarşıdurmada istifadə edildiyi iddiasıyla
ölkəsinin bəzi texnikalar üçün Türkiyəyə verdiyi ixracat səlahiyyətini müvəqqəti
olaraq dayandırdıqlarını elan edib.
