"Mən real vaxt rejimində Nensi Pelosinin İrəvan səfərini izləyirəm. Bu barədə nə deyə bilərəm? Gözləntilər yüksələn xətlə artır”.
Qaynarinfo xəbər verir ki, bu sözləri MDBMİ-nin Beynəlxalq araşdırmalar institutunun elmi işçisi, ekspert və politoloq Sergey Markedonov "Facebook" səhifəsində yazıb.
"Bəzi Teleqram kanalları, hətta ABŞ-a şübhə ilə yanaşanlar (məsələn, erməni vendettası) Vaşinqtonun nəhayət Ermənistanın tərəfini tutduğunu yazır (bu, guya Pelosinin Azərbaycanın "ölümcül hücumlarını” pisləməklə bağlı bəyanatlarından irəli gəlir). Amma bu belə deyil və tezliklə hadisələr bu qənaətin doğruluğunu göstərəcək.
1. ABŞ Türkiyə ilə (NATO üzvü, blokun özündən sonra ikinci ən güclü hərbi qüvvəsi) əməkdaşlıqdan imtina etməyəcək.
2. Birləşmiş Ştatlar, xüsusən də strateji müttəfiqi olan Aİ-də enerji problemləri fonunda Azərbaycan və Ermənistan arasında seçim etməyəcək. Və təbii ki, onlar Bakının ən mühüm tərəfdaşlarından olan İsraildən əl çəkməyəcəklər.
Onların üç əsas məqsədi var: İranı cilovlamaq, Türkiyəni "geosiyasi ekzotizm”dən saxlamaq və Rusiyanı Qafqazdan sıxışdırmaq. Ən mühüm vəzifə isə ümumilikdə hər kiminsə, konkret olaraq Moskva, Ankara və Tehranın Avrasiya alyansına mane olmaqdır. Bu "açar” vəzifədir.
3. Ermənistan NATO-ya sürətli şəkildə qəbul edilməyəcək, hətta Gürcüstan və Ukraynanın hələ oraya üzvlük fəaliyyət planı yoxdur, onlar da Rusiyanın yerinə sülhməramlılar göndərməyəcəklər.
4. Aleksandropiya-1920-dən bəri Rusiya-Ermənistan münasibətlərində Moskvanın kifayət qədər səy göstərməməsi və bu qəbildən olan digər arqumentlər mövzusu vaxtaşırı gündəmə gətirilir. Və demək olmaz ki, Rusiyanı tənqid edənlər həmişə və birmənalı olaraq yanılırlar. Bir nüans. Qərb bundan yaxşısını təklif etmir və etməyəcək də. "Artsax” geri qaytarılmayacaq, Bakıya və ya Ankaraya qarşı "səlib yürüşü” olmayacaq! Nöqtə və beş nida!
5. Sonuncu, lakin heç də əhəmiyyəti az olmayan tezis. Moskvanın bugünkü mövqeyi daha aydın olsaydı, bütün bu böyük gözləntilərin, "Amerikayönümlü” ab-havanın qarşısını almaq olardı.
Minimum rəsmi şəkildə. Və hətta qeyri-rəsmi olaraq. "Yanlış Paşinyanı” günahlandırmağı dayandırın. Onunla yanaşı, bizim regionda öz maraqlarımız var və onlar haqqında danışmaq lazımdır. Bəli, biz sırf erməni maraqlarının operatoru ola bilmərik. Bəli, Azərbaycan və Türkiyə ilə münasibətlərdə qorumalı olduğumuz və itirə biləcəyimiz şeylər var. Amma Bakı və Ankara cütlüyünün Rusiyanın himayəsi altında güzəştə getmədən İrəvan üzərində dağıdıcı hesabla qalib gəlməsi bunlara aid deyil. Paşinyan nə qədər pis və zəif iradəli olsa belə.
Ona və ümumiyyətlə, erməni siyasətçilərinə çoxlu suallar var. Amma indi söhbət onlardan deyil, bizdən gedir. 2020-ci ilin noyabrında İrəvan güzəştə gedə bilərdi və getməli idi də. Amma bu gün Ermənistanın, bizim susqunluğumuz fonunda (hətta 2022-ci ilin sentyabrında silahlı eskalasiyanın dayandırılmasında Moskvanın real vasitəçiliyi belə mediada işıqlandırılmır) bitirilməsi şübhəsiz ki, pis senaridir. Yüz mininci dəfə təkrar edirəm. Böhran vəziyyətinə reaksiya vermək maçizm ilə sinonim deyil. Amma bu, olmalıdır və mənalı sükutla əvəzlənməməlidir”, - rusiyalı politoloq qeyd edib.
Nizami Bağırov
